Tres partidas giogadas, tres partidas bintas, seti gol fatus e mancunu pigau: numurus spantosus cussus de s’Italia de Mancini in is Europeus de fubal chi si funt gioghendu in custas dis! Est acabau eriseru, cun is tres puntus pigaus a su Galles, su gironi aunia si dd’ant giogada Italia, Galles, Svizzera e Turchia, postus comenti funt erribaus in classifica. Imoi tocat a aspetai is atras partidas, po connosciri sa scuadra chi sabudu in Londra si dda giogat cun sa natzionali asula. Cun probabilidadis medas at essi s’Ucraina, allenada de Shevchenko, chi tenit po ddu agiudai finas Màuru Tassotti e su figliu de una bandela de su Milan, Maldera.
Castienduru is partidas de is piciocus de Mancini si podit nai ca funt de avera pagas is scuadras prus fortis, nemus at spantau prus de s’Italia e po nai de aunia erribaiat su fubal italianu tocat a donai meritus mannus a s’allenadori marchigianu. A innantis de totu su trabagliu prus mannu de Mancini est cussu de airi aprontau una truma chena perunu difetu e aunia totus s’intendint de importu mannu. Eriseru at fatu giogai cussus chi ddu iant fatu pagu e nudda in is atras duas partidas, ma non si nd’est pentiu ca chini est calau in campu a donau totu e de prus puru. Sa fortza de s’Italia est custa: chini e chi siat calit in campu ddu fait gherrendusidda! Feti su Belgiu e sa Francia parint prus fortis, ma cussas puru tenint calencuna cosa chi non funtzionat, a ddas castiai beni e seus sigurus chi no est lastima a pensai de ddus binciri. A pustis sa partida de eriseru e cussas giogadas prima, unu chi cumprendit de fubal podit nai ca in su mundu a tenni giogadoris de centrucampu comenti Jorginho, Verratti, Locatelli, Barella e Pessina funt paghissimas, e scieus ca sa fortza manna de is scuadras est a dda cicai propriu in mesu de su campu.
Màuru Mura
“Attività realizzata col contributo della Regione Sardegna – IMPRENTAS 2020-2021 LR 22/2018, art. 22”.
Foto: https://www.youtube.com/watch?v=GvPWBkBqRbY
