A sa fini sa zona birdi est erribada. Sa Sardigna ha feti depiu aspetai una cida in prus de cussu chi si pensaiat. Imoi funt tres, in Italia, is zonas birdis, ca su Molise s’aciungint sa Liguria e sa terra nosta. Totu s’orrestu de s’Italia abarrat in zona groga.

Podint intrai in sa zona birdi cussas regionis chi po catodixi dis ant tentu non prus de binticincu impestaus dogna centumila abitantis e sa positividadi depit essiri de mancu a su 4%.

Zona birdi, intru de is atras cosas, bolit nai ca is citadinus podint andai apetotu. Difatis is natzionis de s’Unioni Europea ant decidiu ca sa genti chi erribat de unu logu in birdi ddu podint fairi chena farta, a is atrus, invecias, si podit pediri de fairi su tamponi o si podint ponni in cuarantena. Cuntentus medas funt is operadoris turisticus, ca una regioni in birdi est bista meglius de is atras.

Is impestaus funt sempiri prus pagus in totu s’Europa, cun sa Germania de sus, sa Romania e sa Polonia chi funt de colori birdi. De s’atra parti sa Spagna de su centru e de basciu cun s’Olanda abarrant in zona orrubia.

Sa Lega cun Italia Viva sighint a pediri a Màriu Draghi de ndi tirai s’obrigu de si ndi tirai sa mascherina in is logus obertus, e finas is steddaus ddu iant a bolli. Prus atentzioni iant a bolli donai, prus che a totu poita arriolaus de sa varianti Delta, is dirigentis de su Partidu Democraticu e finas su ministru de sa saludi Robertu Speranza.

Draghi ancora no at decidiu. Si fut pensau de fairi poderai sa mascherina finas a su 15 de triulas, ma imoi est probabili chi de is primas dis de su mesi ch’intrat si possat cambiai. A pustis un’annu e mesu iat essi cuasi una rivolutzioni! Tocat a arregodai ca giai atras natzionis europeas funt giai andendu in cuss’orruga. Non totus dda pensant a sa matessi manera, e mascamente calencunu scentziau, Draghi at ascurtai unu pagu a totus.

 

 

Màuru Mura

 

 

“Attività realizzata col contributo della Regione Sardegna – IMPRENTAS 2020-2021 LR 22/2018, art. 22”.

 

 

Foto: https://www.tuttocampo.it/Sardegna/News/1384472/nuovo-dpcm-l-italia-divisa-in-tre-fasce