Est nascia sa Super Lega de su fubal. Ddu ant fatu sciri in sa noti de dominigu passau: “Doxi scuadras europeas de fubal ant agatau, totu paris, un’acordiu po fairi nasciri una competitzioni noa, de si giogai intru ‘e mesu de cida, sa Super League, chi at essi cumandada de is scuadras chi dd’ant fata nasciri”, si ligit in d’unu documentu.
“In su benidori – si ligit ancora – is scuadras de sa Super Lega iant a bolli fueddai cun sa Uefa e cun sa Fifa po trabagliai paris po erribai a fairi biviri beni custa Lega e po totu s’orrestu de su mundu de su fubal”.
De sa Uefa non ddi bolint mancu intendiri e totu sa genti est arrennegada cun custu progetu. Est a nai ca su progetu est de scuadras prenas de depidis chi in su tempus passau ant fatu de su sperdissiu un’arregula.
Cosas de macus po chini sighit de una vida su mundu de sa bocia? A parrer nostu nou. Est sa vida chi andat aici e non fait a si ndi scidai feti imoi a cosas fatas. In su fubal, aunia su dinari currit prus de su coru e de is ideas, est sempiri stetiu aici, iat a bastai a si castiai chini at bintu in is urtimus trint’annus, sempiri is matessis scuadras: Inter, Juventus, Milan e calencuna borta is scuadras de sa capitali, chi, a dogna manera faint parti de su mundu de is erricus! Chi custa Super Lega serbit po fairi torrai su fubal comenti ddu eus connotu nosu iat andai beni meda, ma est su mundu chi mudat e non sempiri in meglius. Invecias de morrungiai iat a bastai a non ddus sighiri prus, a non castiai is partidas in televisioni, a non ddis comporai nudda ca tantis est genti chi bolit sempiri prus dinari, ma seus cunvintus ca a sa prima partida binta, de cussas tres scuadras italianas, totu is dudas e is arriolus de is tifosus bengiant scarescius.
Iat a giuai, sempiri a parrer nostu, chi custa Super Lega ce dda facat a si ndi pesai e a si dda baddai e a si dda cantai tra insoru, su sport, po comenti dda bieus nosu, est totu un’atra cosa.
Màuru Mura
“Attività realizzata col contributo della Regione Sardegna – IMPRENTAS 2020-2021 LR 22/2018, art. 22
Foto:https://www.avvenire.it/agora/pagine/superlega-le-reazioni-all-annuncio-calcio
