Intru duas dis, mercuris chi benit, Mariu Draghi at a chistionai in sa Camera de is deputaus e in su Senau e de tandu s’at a decidiri su benidori de su Guvernu. In Palazzo Chigi, po immoi, si funt cunvintus ca is numurus po sighiri non ci siant. Fortza Italia e sa Lega ant giai fatu sciri de non bolliri andai a innantis cun is Steddaus.
Ma is bogis po sighiri, invecias, si faint sempiri prus intendiri e lompint de sa politiga e de sa sociedadi, cun is bogis de sindigus medas, e finas calencunu guvernu internatzionali.
Draghi, at fatu sciri chini dd’est a su costau, est abarrau allirgu meda de sa stima de totus po abarrai aunia s’agatat. De is atrus Stadus dd’ant tzerriau, po nai, su premier olandesu Mark Rutte. Eris, po pagu tempus, at smortu totu e cun sa familia s’est stesiau de Roma po andai a mari, castienduru, a dogna manera, cussu chi sussediat de ora in ora. Oi in su fratempus at essi in Algeria po un’atobiu po afortiai is raportus intru is dus Stadus. Medissimus is impignus istitutzionalis – de is acordius de fairi cun su presidenti Tebboune e cun is medas ministrus a sighiu – a s’inauguratzioni de su business forum. De fatu torrat in Roma po si preparai a cussu chi at a nai mercuris in Parlamentu.
“Custa cida est de importu mannu e non feti po s’Italia. Chi Roma abarrat sbuida est un’atru dannu po s’Ocidenti”, chi invecias abbisongiat de un “alleau de valori chi scit comenti si moviri comenti su presidenti beciu de sa Bce”, scrit, in su fratempus, su Financial Times.
In d’unu documentu chi bit is firmas de Acli, Arci, Atzione Catolica, Confcooperative, Cna, Fuci, Truma Abele, Legambiente, Legacoop Sociali, Libera, Meic, Movimento Politigu po s’unidadi, e obertu a atrus puru si pedit a su su Presidenti de su Consigliu Mariu Draghi e a is fortza politigas chi ddu ant sustenniu de sighiri a trabagliai po non fairi intrai in crisi su Guvernu.
18 de triulas de su 2022
Màuru Mura
“Attività realizzata col contributo della Regione Sardegna – IMPRENTAS 2021-2022 LR 22/2018, art. 22
Foto: https://www.rainews.it/articoli/2022/07/mario-draghi-si–dimesso-quali-scenari-si-aprono-ff8f40c5-12ba-4595-a07d-0476a33ce663.html
