Funt 15.146 is impestaus nous de Coronavirus in Italia in s’urtimu bulletinu de su Ministeru de sa Saludi. Is mortus, invecias, funt trexentunorant’unu. Is tamponis fatus s’acostiant a is trexentumila e bessit, de unu puntu, sa positividadi (de 4,1% a 5,1%). Is impestaus po s’ora, in totu sa natzioni, funt 405.019 e is sanaus o cussus chi funt bessius de is ispidalis, de un’annu a-i custa parti, bessint a 2.185.655, chi bolit nai ca in is urtimas binticuatr’oras funt crescius de 19.838. In is aposentus de terapia intensiva si ddue agatant 2.126, chi funt dus de mancu de sa dì a innantis, e cussus, invecias, chi s’agatant in atrus aposentus calant de 338 e funt imoi 18.942. In totu, de candu est cumentzada sa pesta, in Italia eus tentu 92.729 mortus.
Intru de totu custas novas tocat a cicai cussa bella chi dongiat spera a totus : in sa Valle d’Aosta, po sa segunda dì de sighiu, non si contat perunu mortu.
In Sardigna si contant atrus centubinticincu impestaus e atrus dexi mortus. Calat su numuru de sa genti chi s’agatat in is ispidalis, finas chi de unu crescint cussus de sa terapia intensiva. Su bulletinu de s’Isula de s’11 de friargiu po su Covid-19 aici narat: “Funt 39.950 is impestaus a su Covid-19 in totu de su cumentzu de sa pesta. In s’urtima dì ndi eus tentu centubinticincu e is tamponis fatus, sempiri de friargiu passau, funt 646.950. Si registrant dexi mortus in prus, e funt 1.046 in totu, e s’agatant in is ispidalis 391 tra ominis e feminas, de custus trintatres funt in sa terapia intensiva. Is acorraus in domu funt 13.800 e is sanaus, in totu, bessint a 24.487.
Is impestaus funt aici dividius in su territoriu: 9.271 in sa Citadi Metropolitana de Casteddu, 6417 in sa provincia de su Sud Sardigna, 3.042 in cussa de Aristanis, 7.969 in cussa de Nugoro e 12.891 in sa provincia de Tatari”.
Màuru Mura
“Attività realizzata col contributo della Regione Sardegna – IMPRENTAS 2020-2021 LR 22/2018, art. 22”.
Foto: unisr.it/news/2020/3/viaggio-al-centro-del-virus-come-e-fatto-sars-cov-2
