Partida perdia mali cussa de eriseru a pustis prangiu cun s’Atalanta de Gasperini. Una maja de Muriel, candu sa partida pariat acabada e su Casteddu si dd’iat giogada beni meda, cundennant is piciocus de Di Francesco, un’atra borta, a ndi bessiri de su campu cun mancu unu puntu. Meli po totus, scuadra, allenadori e tifosus, candu s’arbitru, candu sa partida fut cuasi acabada, at donau unu rigori, ma su meli durci est mudau in meli marigosu candu, invecias, est andau a biri totu in sa Var e at decidiu ca non si podiat nai. Murrungius mannus de totus, ma, castiendu beni is imaginis, parit ca su giogadori de s’Atalanda ndi apat boddiu sa bocia e non sa camba de Rugani. Passientzia tocat a tenniri e a non si fairi binciri de su nervosu.
S’Atalanta est forti, nudda de nai, ma Joao Pedro e cumpangius ant fatu de totus po binciri e a abarrai cun d’unu punnigosu de muscas no est cosa facili de nci calai. Imoi sa scuadra de Giulini est posta mali de averas, ma sa partida de cenarba chi benit cun su Torinu de Nicola erribat giusta-giusta po ndi fairi pesai su Casteddu. Difatis su Torinu s’agatat feti a dus puntus prus a sus e bincedu is orrubius-asulus ddus podint giumpai. Ancora no est totu perdiu, nosu sigheus a nai ca su Casteddu s’at a sarvai.
Massiat mali Eusebiu Di Francesco a sa fini de sa partida: “Lastima manna, po mei meritiaus de prus, de is partidas giogadas finas a imoi est stetia una de is meglius. S’Atalanta est una scuadra chi tenit giogadoris fortis e ce ddeus fata a non ddus fairi tirai in porta po tres caurtus de partida, ndi depiaus bessiri sonumancu cun d’unu puntu. Su rigori, castiendu is imaginis, non ddue fut, ma calencuna borta non s’andat mancu a ddu torrai a biri in su Var, comenti est sussediu in sa partida cun su Milan. Sa partida cun su Torinu de cenarba est de binciri, pagu de nai”.
Màuru Mura
“Attività realizzata col contributo della Regione Sardegna – IMPRENTAS 2020-2021 LR 22/2018, art. 22”.
Foto: https://tg24.sky.it/sport/2021/02/14/cagliari-atalanta-gol-highlights-video-serie-a
