“Castiaus cun atentzioni a is manifestadas de chini no est de acordiu a fairi su vacinu chi, arregodu sempiri, non teniant perunu permissu, finas poita funt stetius umperaus simbulus chi fait parti de su tempus passadu, comenti su steddu de David”.

In s’ora de s’atobiu cun is giornalistas in Caserta, su ministru Lucianu Lamorgese at chistionau de is manifestadas contras de s’umperu de su Green Pass, a partiri de su 6 de austu chi benit, chi si funt tentas in Roma e in atras citadis italianas.

Calencunu de is manifestantis, chi funt contrarius a su vacinu, si intendint comenti is ebreus in is tempus de is nazistas.

“Non si podit chistionai de peruna ditadura sanitaria – at sighiu a nai Lamorgese – a si vacinai serbit o binciri custa pesta mala e dogna mesura chi su guvernu at pigau est po difendiri sa saludi de totus. Po mei sa libertadi est a podiri andai aunia bogliu chena fairi dannus a is atrus”.

In Italia eriseru eus tentu atrus 3.177 impestaus nous in pissu de 88.247 tamponis e sa relata intru de impestaus e tamponis bessit a su 3,5%, unu numuru chi non si biat de su mesi de maju passau. Is mortus italianus de eriseru funt bessius a bintidus.

In Sardigna, invecias, su bulletinu de sa Regioni chistionat de atrus 209 impestaus in pissu de 1.301 tamponis, numuru basciu comenti de totu is acabus de cida. Sa relata intru de impestaus e tamponis est de su 16%, numuru artu de averas. Mancu unu mortu in s’Isula, ma si pesat su numuru de chini intrat in is aposentus de is spidalis: sessantacuatru, undixi in prus de sa dì a innanti. In terapia intensiva abarrant in dexi.

Is incungiaus in domu funt centusessantunu in prus e bessint in totu a 3.416.

De candu est cumentzada sa pesta in Sardigna eus tentu in totu 60.298 impestaus e 1.497 mortus: numurus spantosus chi depeus cicai in dogna manera de frimai!

 

 

Màuru Mura

 

 

 

“Attività realizzata col contributo della Regione Sardegna – IMPRENTAS 2020-2021 LR 22/2018, art. 22”.

 

 

 

Foto: https://www.fanpage.it/attualita/manifestazioni-contro-il-green-pass-in-tutta-italia-migliaia-di-no-vax-in-piazza-da-nord-a-sud/