Padentis chi funt diventaus cinisu, animalis mortus abrugiaus, domus sbuidadas e abrugiadas, genti bogada de domu insoru po seguresa. Totu custu est sussediu in s’acabu de cida in Sardigna, is fueddus lassant logu a s’inchietu de totus.
Terras abrugiadas de su Montiferru a sa Planargia e a su Marghine. Po sa Regioni ancora no est possibili a fairi su contu de is dannus, poita finas a eriseru a merì su fogu amelessaiat domus e siendas. Po cicai de binciri is fogus chi teniant ddue funt totus cussus chi ddue podiant essiri: forestali, vigilis de su fogu, Protetzioni civili, volontarius, ma finas sa Croce Rossa Italiana, carabineris e politzia. De su celu seti Canadair e in prus dus chi erribaiant de sa Francia e dus de sa Grecia, pedius de su ministru Luisu Di Maio. Undixi elicoterus de sa regioni, unu de is vigilis de su fogu e un’atru de s’esercitu.
“Una dì chi nos at fatu trabagliai meda – at nau su diretori generali de sa Protetzioni Civili de sa Sardigna, Antoni Balloi – totu is mezus chi teneus funt cichendu de ndi smorri is fogus”.
Su presidenti de sa Regioni, Christian Solinas, at fatu sciri ca at a chistionai cun su presidenti de su Consigliu Màriu Draghi po pediri a su Guvernu “unu agiudu in dinari inderetura po chini at tentu stragu mannu”. Po Solinas, chi at erriciu finas sa lamada de su presidenti de sa Corsica Gilles Simeoni, is fogus funt “unu dolu chi est lastima po sa storia de s’Isula. Ancora non scieus cantu eus perdiu, ma est unu devatu chi non si fut mai bidu”.
Chini bolit beni a sa terra nosta oi non podit fairi atru de amostai is lambrigas, est una lastima manna a biri matas e padentis nieddus, non si ddu minescint is sardus de bona volontadi. Tocat a mudai sa conca de chini ponit fogu e feti cun sa cultura si podit cambiai. Ce dda eus a fairi? Depeus provai, totus!
Màuru Mura
“Attività realizzata col contributo della Regione Sardegna – IMPRENTAS 2020-2021 LR 22/2018, art. 22”.
Foto: https://www.money.it/Incendi-Sardegna-10mila-ettari-bruciati-Apocalisse-ambientale
