Solidariedadi a sa Sardigna in custu tempus dificili po mori de is fogus chi nc’ant papau padentis e siendas, ponendu in genugu genti meda, massimamenti pastoris e massaius, est stetia donada de su presidenti de sa Repubblica italiana, Sergiu Mattarella. Su presidenti at tzerriau a su telefunu su guvernadori sardu, Christian Solinas, po sciri comenti est andendu e po ddi fairi sciri ca est a su costau de totu is sardus. Fueddus durcis finas po totus cussus chi ant agiudau a binciri is fogus.
Eriseru in s’Isula est erribau su capu de sa Protetzioni Civili italiana, Fabritziu Curcio, po cicai de cumentzai a fairi sa conta de is dannus e s’est agatau in is aposentus de sa Protetzioni civili de Casteddu. Paris cun Curcio funt su capu de sa PC regionali Antoni Pascali Belloi, su presidenti de sa Regioni e s’assessori a s’Ambienti Giuanni Lampis.
“Eus trabagliau beni po ndi smorri is fogus chi, mai comenti custa borta, si funt bidus – at nau su guvernadori a pustis s’atobiu casteddaiu -. De su cumentzu eus intendiu s’agiudu de totus e po custu torru gratzias a su presidenti Draghi, a sa Protetzini Civili e a is vigilis de su fogu”. “Imoi, at aciuntu est s’ora de cicai de biri totu is dannus e agiudai pastoris, siendas e cussus chi ant perdiu totu”.
Po oi, po mori de su calori chi est fendu, sa Protetzioni Civili at artziau s’erriscu de atrus fogus, prus che a totu in sa zona de su centru Sardigna.
In su fratempus sa Forestali at cumentzau s’indagu po connosciri is curpas de totu cussu chi est sussediu e po biri chi in palas de is fogus ddu est sa manu de calencunu. Po s’ora sa procura de Aristanis no at obertu perunu fasciculu. Su fogu prus mannu est de seguru cussu chi est partiu de Bonarcado e Santu Lussurgiu chi, in segus, est andau a innantis po chilometrus meda in totu su Montiferru: una machina, de cussu chi si connoscit po imoi, at pigau fogu in sa strada provinciali de Bonarcado e de tandu est diventau s’inferru po totus.
Màuru Mura
“Attività realizzata col contributo della Regione Sardegna – IMPRENTAS 2020-2021 LR 22/2018, art. 22”.
Foto: https://www.quirinale.it/elementi/45537
