“Sa pesta no est ancora binta, feti cun su vacinu dda podeus ponni a un’ala. Nemus podit rinuntziai a sa libertadi, ma est su virus chi nosi fait rinuntziai, non is regulas e is maneras de ddu binciri”. Fueddus grais cussus de su Presidenti de sa Repubblica Sergiu Mattarella in s’atobiu po s’urtima cerimonia de su Ventaglio in su Quirinali.
“Chi sa lei non narat atru – sighit a nai su Presidenti – si podit nai ‘In domu miu su vacinu no intrat”, ma custu non si podit nai po atrus logus aunia podint andai totus: sa genti tenit diritu chi nemus portit sa pesta”. “Sa pesta no est binta, su virus est mudau e impestat ancora de prus de a innanti. Prus passat su tempus chi est in giru e prus mudamentus e pericolosidadi podit tenni. Feti torrendu gratzias a su vacinu ddu poedus binciri. Est a nai ca finas chini fait su vacinu si podit impestai, ma de seguru tenit meda prus pagu possibilidadi de chini non ddu fait. Po custu bosi nau ca a si vacinai est unu doveri morali e civili”, at aciuntu.
Ancora is fueddus de Mattarella: “Eus passau un’annu dificili, cun malaidus e mortus. A bellu a bellu, e non chena dificultadi, seus cichendu de torrai a biviri e po custu eus scioberaus duas orrugas: is vacinus e s’agiudu de su Stadu. Funt duas orrugas chi nos ant donau fidi e spera manna”.
Non feti de vacinus e virus at fueddau Mattarella, ma finas de scola: “Eus bidu in is urtimus dus annus ca is piciocus ant tentu dannus culturalis e suferentzia manna. Depeus cicai de torrai a una scola chi torrit a imparai. Po mei est sa prima cosa chi tocat a fairi cussa de ponni sa scola in pissu de totu”. A is partidus puru non dda mandat a nai: “Contu chi in custu tempus sigant a trabagliai po su beni de s’Italia. Si depit pensai ca est unu tempus de emergentzia e nemus si ndi depit scaresciri. Non si pensit mai ca teneus totu a is palas”.
Màuru Mura
“Attività realizzata col contributo della Regione Sardegna – IMPRENTAS 2020-2021 LR 22/2018, art. 22”.
Foto: https://www.avvenire.it/attualita/pagine/mattarella-discorso-cerimonia-ventaglio-covid-giustizia-riforme
