De su ses de austu, duncas de cenarba chi benit, at a serbiri su “green pass” po totu is logus a su serrau comenti bar, pitzerias e ristorantis, e finas po piscinas e palestras. At a serbiri finas po cuncertus o atra manifestadas aunia s’erriscat de non si podiri stesiai s’unu cun s’atru.

Po sa genti chi viagiat, invecias, su pensamentu de su guvernu est cussa de tenni s’obrigu po navis, aparechius e trenus e de non ddu fairi balliri po is citadis, duncas po bus, tranvius e metropolina. Ancora de custu non s’est decidiu, ma de cussu chi si pensat totu at essi prus craru de sa cida ch’intrat cun su DL, chi at a pigai in cunsideru finas is impestamentus nous.

In pissu de is mezus, de cussu chi si narat, at essi su personali a controllai, comenti giai faint po is atrus documentus. Su green pass depit nai ca sa prima dosi de su vacinu est fata sonumancu cuindixi dis a innantis o chi si est sanaus de su Codid in ses mesis prima o galu s’arresurtau negativu de unu tamponi in is urtimas duas dis.

In s’ora, eriseru, atrus 314 impestaus nous, de su Covid, in Sardigna, in pissu de 3.117 tamponis fatus. Aici sa percentuali de sa pesta abarrat, comenti de una pariga de dis a custa parti, a su 10%. Sa nova bona est ca non teneus mancu unu mortu, chi abarrant 1.501 de su cumentzu de sa pesta, e sa nova mala est ca in sa terapia intensiva ndi imbucant atrus cuatru.

Is impestaus nous s’agatant in su numuru de otantaseti in Tatari e provicia, tres in Nugoro e provincia, centusetantanoi in Casteddu e is biddas in is orus, trintacuatru in su Sud Sardigna e undixi in Aristanis e provincia.

Cun is duxentusessantacuatru de eriseru, imoi funt 5.120 cussus chi s’agatant incungiaus in domu e corantaseti, invecias, funt is sanaus.

Is contus nous funt ca is impestaus, de su mesi de martzu de su 2020, bessint a 62.365 e is sanaus 55.652.

 

 

Màuru Mura

 

 

 

“Attività realizzata col contributo della Regione Sardegna – IMPRENTAS 2020-2021 LR 22/2018, art. 22”.

 

 

 

Foto: https://crema.laprovinciacr.it/sondaggi/cremona/361083/green-pass-obbligatorio-dal-6-agosto-decisione-giusta.html