Crescint, in Italia, is impestaus nous de su covid, ma calat su numuru de is mortus. Eriseru eus tentu 5.696 impestaus, chi funt 1.174 in prus de sa dì a innantis, e cuindixi mortus. Is tamponis funt stetius 241.890 e sa percentuali de positivus est de su 2,3%.
In is terapias intensivas abarrant in 183, a pustis chi in ses ndi funt bessius, e is obrigaus in is aposentus de is spidalis funt 1.685, setantacuatru prus de sa dì a innanti.
De su cumentzu de sa pesta cussus impestaus in totu funt 4.330.739 e is mortus 128.010. Sa genti bessia de is spidalis e sanada est in numuru de 4.128.568 e cussus positivus po s’ora funt 74.161.
Is regionis cun su numuru prus artu de impestaus funt su Latzio cun 772, sa Lombardia cun 720, sa Toscana cun 661, sa Sicilia cun 627 e su Veneto cun 544.
In sa terra nosta funt 403 is impestaus nous e mancu unu mortu. De su cumentzu de sa pesta in Sardigna, duncas, eus giumpau is sessantunumila e is mortus si frimant a 1.498. Bonas novas po is obrigaus in is spidalis: funt sessantanoi cussus chi s’agatant in is aposentus, unu de mancu de martis passau. In terapia intensiva, invecias, unu in prus e imoi si ddue agatant in noi. Is sanaus in totu funt 55.451 e is incungiaus in domu 3.968.
Totu is impestaus de s’urtimu bulletinu regionali funt aici dividius in su territoriu regionali: coranta in sa provincia de Tatari, tres in cussa de Nugoro, trexi in sa provincia de Aristanis, duxentussessantotu in sa provincia e citadi de Casteddu e setantanoi in su Sud Sardigna.
Fueddendu, invecias, de vacinus funt 66.694.614 cussus fatus in totu chi bolint nai ca in 31.177.060 ddus ant fatus totus e dus. Su vacinu prus fatu est su Pfizer/BioNTech cun 49.585.637 e a sighiri su Astrazeneca cun 11.893.826. Dapoi agataus su Moderna cun 7.574.284 e su Janssen cun 2.274.642.
Màuru Mura
“Attività realizzata col contributo della Regione Sardegna – IMPRENTAS 2020-2021 LR 22/2018, art. 22”.
Foto: https://lab.gedidigital.it/gedi-visual/2020/coronavirus-i-contagi-in-italia/
