Est spantu mannu po sa chistioni de su bocidorgiu de Garlasco. A pustis de dixiot’annus de sa morti de Crara Poggi, po cussu chi narat su Tg1, ant scritu in su libburu de s’indagu a Andria Sempio, amigu de su fradi de Crara.
Su piciocu, chi teniat dixiannoi annus candu totu est sussediu, ddu iant giai postu suta indagu, massimamenti comenti pediant is abogaus de Arbertu Stasi, chi est fendusì su presoni a pustis sa cundenna cun sa curpa de airi bociu a Crara, oi su DNA agatau a suta de is ungas de sa picioca morta. DNA, est a nai, ca non fut de Arbertu Stasi. Su indagu in pissu de Sempio a dogna manera ddu iant postu a un’ala. A cantu si connoscit s’indagu nou benit fatu poita, in su tempus, atras tecnicas si funt imparadas po ligiri meglius ancora su DNA.
Giobia Sempio s’at a depiri amostai de is carabineris de Milano po fairi su tamponi cun sa salia. Est unu esami obligatoriu cumandau de su Gip de Pavia, a pustis chi sa cida passada, su matessi Tempio, no iat acetau de fairi atrus esaminis in pissu de su DNA.
Sempio est suta indagu, duncas, po airi bòciu a Crara Poggi cun atra genti o cun su matessi Arbertu Stasi, sposu de Crara e giai cundennau de sa giustissia a seixi annus de presoni po su bocidorgiu de su treixi de austu de su 2007.
Custu misteriu at traessau cincu processus e po duas bias, a innantis de sa cundenna, s’est serrau su mesi passau cun s’urtimu fueddu de sa Corti Europea de is diritus de s’omini chi no at fatu cantu beniat pediu. S’acabbu de sa cundenna de Arbertu Stasi, chi oi tenit corantadus annus, est po su 2030. Ma, po mori de airi fatu a bonu, iat essi finas dus annus a innantis, in su 2028.
Candu dd’ant bòcia, Crara Poggi, iat lompiu is bintises annus. Fut a sola in sa domu aunia biviat cun sa familia in Garlasco. Su babbu, sa mama e su fradi furint in vacantza e po is indagadoris connosciat chini dd’at morta poita iat obertu sa janna cun su pigiama in pissu.
Màuru Mura
Mercuris, su doxi de martzu de su 2025
Attività realizzata col contributo della Regione Sardegna – Imprentas 2024-2025. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2024-2025. Lei Regionali 22/2018
Foto: https://tg.la7.it/cronaca/chiara-poggi-andrea-sempio-delitto-di-garlasco-11-03-2025-233564
