Su guvernadori de sa Liguria Giuanni Toti amelessau in is social po mori de is fueddus chi at umperau a favori de is vacinus e de su green pass.
Ma su presidenti de sa giunta regionali at arrespustu chena si mossiai sa limba a totu cussus chi ddu ant amelessau, cun d’unu post in Facebook aunia si ligit: “Mi narais ca soi unu ditadori, ma is solus chi seis contras de sa libertadi seis bosatrus. Poita cun su no a fairi su vacinu andais contras de sa libertadi de totus. Ma bosi ndi seis scarescius de su tempus passau cun totu is mortus chi teniaus dogna dì, candu sa spera fut feti de connosciri unu vacinu in pressi e, invecias, imoi, seus dividius in custa bataglia? Deu non ddu cumprendu. De oi in sus denunciu totu is fueddus malus e is augurius de morti chi in numurus spantosus soi erriciendu de candu apu fueddau a favori de su green pass”.
“Non mi ndi frigat nudda – sighit a scriri Toti – chi non mi votais prus, poita no esistit bandela in custa gherra. No incungiaus in domu, po is curpas bostras, cussus chi cun cuscientzia ant scioberau de fairi su vacinu. Po cussu chi pensu deu s’incungiamentu depit essiri feti po cussus chi non funt vacinaus. Non mi feis a timiri e cantu prus in pressi ap’a fairi su de dus vacinus. Torru gratzias mannas a sa scentzia”.
In s’ora de totu custus machioris in Sardigna su numuru de is impestaus nous a su Covid sighit a si ndi pesai. Eriseru, po su bulletinu regionali, ndi eus tentu atrus 274 chi faint bessiri a 58.990 is impestaus in totu de su mesi de friargiu de ocannu passau. Is novas bonas funt ca is mortus abarrant frimus a 1.495 e su numuru de sa genti chi s’agatat in is aposentus de is spidalis calant. Sa nova mala, invecias, est ca in sa terapia intensiva nd’intrat un’atru.
Lastima manna, certu, ma tocat a tenni fidi in su benidori e tenni cuscientzia de cussu chi seus bivendu.
Màuru Mura
“Attività realizzata col contributo della Regione Sardegna – IMPRENTAS 2020-2021 LR 22/2018, art. 22”.
Foto: https://twitter.com/giovannitoti
