De su ses de austu diventat obrigu tenni su Green pass po intrai in is ristorantis a su serrau e po bufai, in sa mesigedda, finas in is bar. At a serbiri in is palestras, cinemas, manifestadas sportivas e culturalis e po pigai parti a is cuncursus pubricus.
Custas funt is regulas noas de su DL in pissu de su coronavirus chi serbint po cicai de poderai numurus bascius in is impestamentus. Po tenni in buciaca su Green pass, si narat, serbint mascamente airi fatu su primu vacinu o sinuncas unu tamponi in is urtimas duas dis. Po chini, invecias, est sanau de su Covid balit po ses mesis a pustis.
Emergentzia po su Covid, chi est po acabai su 31 de triulas, at a balliri finas a su 31 de Nadale. Cambiant is regulas po intrai in zona de erriscu: cincuanta impestaus dogna centumila abitantis est su minimu po passi de sa zona arva a cussa groga e sa novidadi est ca ant essi castiaus puru is numurus de is spidalis, in is aposentus e in is terapias intensivas.
Su Green pass at a serbiri po bufai e papai in is bar e in is ristorantis, ma non est necessariu po chini abarrat in su bancu. At a serbiri, dapoi, po cuncertus in logu obertu, museus, logus de curtura e mostras, piscinas, palestras, po fairi calechisiat sport de scuadra e in atrus logus meda.
In is cinemas e in is tiatrus, aunia s’at a podiri intrai cun su Green pass, crescint is postus po sa genti: in logu obertu, chi s’agatant in zona groga, si passat de unu numuru massimu de milli a duamila e cincuxentus e a su serrau de cincuxentus a milli. Invecias in zona arva, a s’obertu, podint intrai in cincumila.
Is discotecas abarrant serradas ma erribat dinari friscu: binti milionis.
Po chini non sighit is regulas erribant multas chi andant de cuatruxentu a milli euros e, a pustis tres bortas, si podit serrai su locali de una a dexi dis.
Màuru Mura
“Attività realizzata col contributo della Regione Sardegna – IMPRENTAS 2020-2021 LR 22/2018, art. 22”.
Foto: https://www.ilmeteo.it/notizie/green-pass-cos-a-cosa-serve-quanto-dura-e-come-si-fa-ad-ottenerlo-143808
