S’allenadori de sa Natzionali at fatu connosciri is nominis de is giogadoris chi de s’11 de làmpadas s’ant a giogai is Europeus de fubal. De sa lista de 28 chi iat donau dominigu passau nd’at tirau a foras atrus tres: Mancini, Pessina e Politano. In difesa abarrat Toloi, a centrucampu agataus Sensi e finas Cristante e in atacu benit torrau a lamai Raspadori.

S’Italia pusti cras at a giogai s’urtima partida, amichevole ddi narant, cun sa Repubblica Ceca, a innantis de fairi sa prima partida de totu is Europeus cun sa Turchia in Roma.

Custus funt is giogadoris: Donnarumma, Meret e Sirigu comenti de portieris; Acerbi, Bastoni, Bonucci, Chiellini, Di Lorenzo, Florenzi, Emerson Palmieri, Spinazzola e Tolois is difensoris; Barella, Cristante, Jorginho, Locatelli, Pellegrini, Sensi, Verratti is giogadoris de mesu campu; Belotti, Berardi, Bernardeschi, Chiesa, Immobile, Insigne e Raspadori is atacantis.

Sunfriu depit essiri stetiu su scioberu de Mancini ca at fatu sciri is nominis feti a s’urtimu. Difatis s’Uefa iat donau tempus finas a sa mesunoti de martis e s’allenadori italianu, a diferentzia de is atrus allenadoris strangius, at presentau sa lista calencunu minutu a pustis. Forsis non teniat craru craru cussu chi serbiat. “Est su tempus prus legiu”, iat nau in is dis passadas. At ascurtau cussu chi teniat de ita nai de su su professor Ferreti po comenti istaiant cussus chi si funt strupiaus e a pustis at intendiu finas Oriali cun Vialli.

Calencunu podit abarrai spantau de su scioberu de Giacomo Raspadori, s’atacanti de su Sassuolo, chi fut bessiu de sa lista de is bintotu, ma sa partida cun su Portogallo de s’Under 21 at cunvintu Mancini ca su giogadori ddi serbit.

Imoi non si podit torrai a palas e tocat a ponni conca a is partidas. Mancini at sempiri giogau po binciri, eus a benni a biri comenti andat custa borta.

 

Màuru Mura

 

 

“Attività realizzata col contributo della Regione Sardegna – IMPRENTAS 2020-2021 LR 22/2018, art. 22”.

 

 

Foto: https://www.marcheingol.it/2020/08/03/roberto-mancini-un-marchigiano-che-ancora-oggi-farebbe-la-differenza-028758/