Interru in sa basilica de Santa Maria de is Angilus e de is Martiris de Roma po s’Ambasciadori Luca Attanasio e su carabineri Vitoriu Iacovacci, bocius s’atra dì in Congo. Is baulus, imboddiaus de sa bandela de s’Italia, ddus ant acumpangiaus finas a sa cresia is carabineris chi trabagliaiant cun Iacovacci e totu. A sa missa ddue funt totu cussus chi contant, de su presidenti de su Guvernu Màriu Draghi a is ministrus Luisu Di Maio, Luciana Lamorgese, Giuannicarrulu Giorgetti e is presidentis de sa Camera e de su Senau Orrobertu Fico e Maria Elisabetta Casellati. Finas sa sindaga de Roma, Virginia Raggi, fut in cresia po fairi intendiri, a is familias de Attanasio e Iacovacci, cantu Roma est a su costau insoru.

Sa cresia fut serrada a totu s’atra genti, non podiat intrai a intru, ma in medas funt in foras po solidariedadi a is familias de is dus mortus.

In is primus bancus de sa Basilica, in prus de is ominis de su Stadu, intru de sa genti de familia, ddue fut sa podidda de Attanasio cun d’una veleta niedda e in brassus una de is figlias. A fairi sa missa c’at pensau su cardinali Angilu De Donatis.

In su fratempus de sa missa de Roma, in Congo, sa genti chi trabagliat in s’Ambasciada, sighendu totu is arregulas de su Dpcm po su Coronavirus, duncas cun faciola in cara e abarrendu a sa stesiada, at bofiu arregodai s’ambasciadori e su carabineri mortus atobiendusì e abarrendu citius po unu minutu: lambrigas e artudda po totus ca is dus funt bofius beni meda.

Totus, in sa Basilica, cun atentzioni manna, ant ascurtau is fueddus de su Cardinali: “Est suferentzia po nosu a pensai chi ominis meda bolint feti dinari e non de ddis frighit nudda de bociri”, “Luca Attanasio e Vitoriu Iacovacci ddus ant bocius, custas mortis ant a betiri atru dolu. Arregodaisì ca de su dolu erribat feti atru dolu!”.

Giustissia, feti giustissia ci iat a bolli imoi!

 

Màuru Mura

 

 

 

“Attività realizzata col contributo della Regione Sardegna – IMPRENTAS 2020-2021 LR 22/2018, art. 22”.

 

 

Foto: https://tg24.sky.it/cronaca/2021/02/25/funerali-di-stato-attanasio-iacovacci