Bastaiat a cambiai s’allenadori po torrai a binciri? Aici parit. Dominigu de festa po su Casteddu ca, a sa prima partida cun Lionardu Semplici allenadori, eriseru nd’est torrau de Crotone cun tres puntus in prus in classifica. Dus gol in su segundu tempus, a pustis airi sunfriu unu pagu in is primus corantacincu minutus de giogu, ant permitiu a sa scuadra sarda de stesiai unu pagu de prus su Parma e su Crotone e totu. Pavoletti cun su capitanu Joa Pedro funt cussu chi ant fatu is gol, ma est su modu de giogai de totu sa scuadra chi fait biri su benidori cun atrus ogus. Imoi su Torinu est a dus puntus, finas chi sa scuadra de Nicola depiti ancora giogai una partida, ma funt massimamenti su Spezia cun su Benevento chi de eriseru funt atesu “feti” de seti puntus. A pareri nostu sa cursa de su Casteddu si depit fairi, prus che a totu, in pissu de custas duas scuadras, poita, a pustis de airi fatu puntus meda, in is urtimas cidas parit chi funt torrendu aunia totus s’aspetaiant.

Una borta acabada e binta sa partida Semplici at chistionau cun is giornalistas, custus funt is fueddus chi at umperau: “A su cumentzu de sa partida eus sunfriu unu pagu, ma mi est pragia meda sa gana chi ant tentu is piciocus de abarrai unius, massimamenti candu seus abarraus in dexi. A dogna manera fut importanti a partiri beni e ci seus arrennescius, imoi depeus pensai feti a sighiri a trabagliai. De candu soi erribau soi trabagliendu meda chistionendu cun is giogadoris unu po unu, poita sa conca contat meda e tocat a non pensai prus a is partidas perdias, ma tocat a castiai su benidori cun fiducia. Nosi depeus ponni in conca ca sa scuadra tenit giogadoris aberu fortis e ca nosi depeus torrai a pesai in classifica, ca a dda biri est legia”.

In segus Semplici est torrau in pissu de sa decisioni sua de nai ca eja a Giulini: “Tenia gana manna de torrai a allenai. Su Casteddu po mei est una grandu ocasioni e no apu tentu duda peruna connoscendu is giogadoris chi depia sighiri. Deu soi cunvintu ca eus a fairi beni, ma, comenti de sempiri, at essi su campu a nai is cosas giustas”.

 

 

Màuru Mura

 

“Attività realizzata col contributo della Regione Sardegna – IMPRENTAS 2020-2021 LR 22/2018, art. 22”.

 

 

Foto: https://www.eurosport.it/calcio/serie-a/2020-2021/serie-a-le-pagelle-di-crotone-cagliari_sto8153760/story.shtml