Funt erribendu treminis nous, po su Coronavirus, chi ant a balliri finas a pustis Pasca Manna. Ddu at annuntziau, chena ddu mandai a nai, su ministru de sa Saludi Orrobertu Speranza in Parlamentu. Is arregionis funt craras a totus: sa varianti ingresa, tra pagu tempus, at essi cussa prus presenti, s’Rt at a superai sa mesura de 1, is terapias intensivas, sonumancu in cincu regionis, funt in pissu de su 30%. Cun custus numurus, duncas, “non ci funt is cunditzionis po abasciai is mesuras”.
Su Dpcm nou at a partiri de su ses de martzu chi benit e at a durai finas a su ses de arbili. A non ponni menti a is regulas, po Speranza, iat essi una cosa mali fata ca “un’atra pesta iat fairi intrai in crisi manna is ispidalis, cun problemas mannus finas po is vacinatzionis. Sa strada est cussa de sighiri a fairi comenti seus fendu”.
Oi su ministru, paris a Mariastella Gelmini, chi est sa ministra noa de is Afaris regionalis, aotbiant is Regionis, is Provincias e is Cumunus e ant a chistionai prpriu de is mesuras noas de ponni in campu.
Si amanniat sa truma de cussus chi pedint de fairi torrai a oberri calencuna ateividadi comenti bar e ristorantis. Ddu pedit a bogi arta Giorgia Meloni e insistit finas Mateu Salvini: “Creu chi su pensamentu de torrai a una vida cuasi normali de calencunu chi est serrau de tempus meda est finas de su presidenti Draghi. Saludi e trabagliu non funt duas cosas chi depint andai una a costau de s’atra, ma erriscaus de perdiri dus milionis de postus de trabagliu. Custu est su problema mannu”.
Non torrat a coa su presidenti de s’Emilia Romagna Istevini Bonaccini: “Candu su ministru Franceschini, chi mi parit est ancora a intru de su Pd – arregodat – at proponniu, candu at essiri possibili, de torrai a oberri non feti is museus, ma finas cinemas e tiatrus, chistionat beni meda”.
Màuru Mura
“Attività realizzata col contributo della Regione Sardegna – IMPRENTAS 2020-2021 LR 22/2018, art. 22”.
Foto: www.viagginews.com
