At passau su noti in su spidali Santu Arrafiaeli de Milanu, su capu de Fortza Italia Sirviu Berlusconi, a pustis ddu essiri imbucau un’atra borta. S’agatat in sa terapia intensiva, po mori de tenni problemas cardiovascolari, a pustis chi non ce dda faiat a sulai beni. Si chistionat de una promonita e de una maladia a su sanguni chi calencuna pensat podit essiri leucemia. De cussu chi si narat, sa situatzioni iat essi legia, ma sempiri sa matessi, né de prus e né de mancu.
“Sa saludi de Berlusconi est sempiri sa matessi, at passau una noti in trancuillidadi”, at fatu sciri su coordinadori de Fortza Italia, Anoni Tajani.
In sa dì de eris, mercuris, a agatai Sirviu Berlusconi funt lompius totu is figlius e su fradi Paulu. Su matessi fradi, bessendudendi de su spidali at chistionau cun is giornalistas, chi inderetura funt erribaus comenti ant scipiu sa nova. “Sirvius est sempiri oguali, is cunditzionis de saludi funt sempiri su propriu. Est un’orroca. Coment’est de gana? Est postu beni. Nosu purus seus in spera e seus segurus ca ce dd’at a fairi custa borta puru”.
Medas de averas is messagius de acostiamentu lompius a su presidenti de su Consigliu beciu, a cumentzai de cussu de su presidenti de su Governu de immoi, Giorgia Meloni.
Sa nova de su ricoveru de Berlusconi est sighia de totu is giornalis e televisionis de totu su mundu. De su Washington Post a su Guardian, de su Spiegal a France24, de Al Jazeera a su giornali australianu News.Com.au e finas in su giornali canadesu de su Toronto Star. In totu custus giornalis si bit sa fotografia de Berlusconi cun, in cuasi totus, is fueddus “Sirviu Berlusconi, otantases annus, est ricoverau in terapia intensiva cun problemas de respiratzioni”. Augurius mannus a Sirviu Berlusconi, chi possat torrai a cumbatiri e sighiri a biviri finas a centu e prus annus.
Màuru Mura
Giobia, su ses de arbili de su 2023
Foto: https://www.ilmeteo.it/notizie/silvio-berlusconi-lex-premier-ricoverato-in-terapia-intensiva-gli-aggiornamenti-sul-suo-stato-di-salute-082538
