Fut su dus de martzu de su 1986 e Maradona giogaiat in Italia giai de dus annus e ancora no iat faddiu mancu unu rigore. In su San Paolo su Napoli si dda biat cun su Torinu de Gigi Radice. Su Napoli fut giai bincendu po 3-1 candu a unu cuartu de ora de s’acabu s’arbitru donat unu rigori a is napoletanus. Andat de is undixi metrus Maradona e in porta de su Torinu s’agataiat Copparoni. Tirat su campioni argentinu e parat su portieri nasciu in Santu Engiu. Bastat custu po fairi passai a sa storia de su fubal italianu custu portieri sardu: est stetiu su primu italianu a parai unu rigori a Maradona!
Arrenatu Copparoni est nasciu in Santu Engiu su 27 de su mesi de talamini de su 1952. Cumentzat a giogai cun is piciocus de su Casteddu e indenanti teniat portieris fortsi de averas: Erricu Albertsi cun Adrianu Reginato. Allenendusì cun issus de seguru calencuna cosa a is dus si nde dd’at furada. Giogat po sa prima borta in Serie A su 13 de maju de su 1973 in Casteddu contras de su Torinu. Abarrat in su Casteddu finas a su 1977-78 paris a is atrus portieris William Vecchi e, a pustis, Orrobertu Corti. In su 1978-79 andat a fairi su segundu portieri in su Torinu, sighit is studius in Scentzias politigas erribendu a si laureai. Meda panchina faiti a is palas a innanti de Terraneo e dapoi de Martina, ma in su 1986-87 giogat 21 partidas de campionau.
S’annu infatu andat a giogai a Verona, e in su 1988 s’arretirat po cumentzai a trabagliai paris cun Dominigu Caso, connotu in Torino, comenti de allenadori de is portieris cun is giovunus de sa Lazio. Abarrat in Roma po cinc’annus aunia bincit su campionau Primavera in su 1995. Sighit a trabagliai cun Caso, candu custu benit lamau a innantis de su Foggia e a pustis cun su Chievo.
A manera sua, po cussu rigore aciapau de Maradona mascamente, est abarrau in sa storia de su fubal italianu.
Màuru Mura
“Attività realizzata col contributo della Regione Sardegna – IMPRENTAS 2020-2021 LR 22/2018, art. 22”.
Foto: https://www.goal.com/it/notizie/renato-copparoni-il-primo-portiere-italiano-che-paro-un-rigore-a-/1rzmt8hxgvibfz2ntaeepysrc
