De eriseru in Sardigna teneus ses provincias (Nord-Est, Nugoro, Ogliastra, Aristanis, Campidanu de mesu e Surcis Iglesiente) e duas citadis metropolitanas (Casteddu e Tatari). Su Consigliu Regionali at amitiu sa lei cun trintacuatru consiglieris chi ant nau ca giai e feti seti chi ant nau ca nou.
Funt stetias cambiadas, massimamenti, sa provincia de Nugoro e sa Citadi Metropolitana de Casteddu chi passat de dixiaseti a setantunu cumunus. Tiradas de mesu sa provincia de Tatari e cussa de su Sud Sardegna, chi meda iat fatu fueddai in su tempu chi dda iant fata.
“Custa lei est nascia in is territorius, oi donaus bogi a is sindigus e a is fortzas sindacalis e cussa chi produsint”, at nau s’assessori de is Enti Locali Quirico Sanna.
Is provincias s’ant a podiri uniri in Unioni de Provincias, finas a unu massimu de tres po gestiri is servitzius. A intru de trinta dis de sa publicatzioni de sa lei in su Buras, is Cumunus podint pediri de ci bessiri de is Citadis metropolitanas de Casteddu e de Tatai e de is provincias cun sa delibera de su Consigliu Comunali votau de totus. Chi, invecias non benit deliberau o chi non benit votau de totus s’at andai a scioberai cun d’unu referendum.
Custa Riforma noa costat a sa Regioni 796mila eurus po ocannu e 835mila po ocannu chi benit. Non s’est coidau meda poita ddue fut una chistioni manna po chini pigaiat su incarrigu de capu in sa citadi metropolitana de Casteddu. A sa fini s’est agatau un’acordiu intru de is partis: Paulu Truzzu abarrat comenti sindigu metropolitanu e po is cincuanta cuatru cumunus nous de sa citadi metropolitana de Casteddu at essi fatu unu “Commissario straordinario” chi at a durai finas a su 31 de Mesi de Idas.
Invecias, in sa citadi metropolitana de Tatari, Nanni Campus, giai sindigu de Tatari, at essi finas sindigu metropolitanu.
Màuru Mura
“Attività realizzata col contributo della Regione Sardegna – IMPRENTAS 2020-2021 LR 22/2018, art. 22
Foto:https://www.facebook.com/photo/fbid=10225555492382454&set=a.4724749884983
