Corant’annos como, su 12 de Austu de su 1981, Antoni Piredda cun Peppe Sozu fatein una gara in Seddori pro sa festa de Santu Larentu. Sozu e Piredda formaian una joba a galania, de sas pius massissas de tota s’istória de sas garas poeticas. Unu cumprou jaru lu tenimus finamentra in sa gara chi comintzamus a imprentare cun s’esórdiu: sun 44 otavas de prima calidade, friscas che rosa e pienas che ou. Cando an cantadu in Seddori Antoni Piredda teniat 76 annos e Peppe Sozu 67.
- Sozu (1’26”)
Nde so torra in terrinu seddoresu,
una zona bastante trancuilla.
E ch’at antigu e nou, apo cumpresu:
domos betzas, casteddu e calchi villa.
De duos campidanos posta in mesu
su centru e capitale ’e sa Marmilla:
continu a ti mirare mi est recreu
e aggradessi su saludu meu.
- Piredda (57”)
Seddori, cando a mie as fatu apellu
mi so interessadu ’e non mancare.
Tra su mamentu feu e-i su bellu
cantas notes passadu amos umpare:
sas primas pro mi abberrer su cancellu,
como che torro a ora ’e lu serrare.
E unu saludu bos torro a ofèrrere
che cando chi ’enia po l’abbèrrere.
- Sozu (1’09”)
A serrare sa janna est un’arriscu,
Antoni, non prosigas su lamentu.
Inoghe amos cantadu a caldu e friscu
in notes calmas e notes de ’entu:
cand’a sa festa de Santu Frantziscu.
cand’a sa festa de Santu Larentu.
E como ’e poesia a su radunu
nos presentamos in s’annu otantunu.
- Piredda (55”)
Seguramente dae festa in felta
chi si podet cantare poesia
nois nos amus fatu cumpagnia
coment’e manu manca cun sa drelta.
(Ma) deves ischire chi sa janna mia
da setantaset’annos est abbelta
e so istracu de drommire fora,
guasi ’e la serrare ’énnida est s’ora.
- Sozu (59”)
Ancora ses serenu e finas forte
a fàghere una gara improvisada.
Sa zente s’est inoghe radunada
e sos tifosos ti fàghene corte
e deo so pensende chi sa morte
si nde siat de te ismentigada.
Si como est tribagliende in aterue
non dia cherrer chi la james tue.
- Piredda (51”)
Su chi m’as nadu in cuss’improvisada
da palte mia analizo e assomo
o forsi, Peppe, as s’idea fissada:
sezis istracos de m’àere in domo
e narrer chi si nd’est ismentigada
tando cheristi a morrer prima ’e como.
Per’ancora no apo dadu adiu:
acantu a tie cantende so ’iu.
- Sozu (56”)
Como ’etadu che as s’assu ’e fiori
però no est triunfu, ite fragellu!
Da chi ses folte, coloridu e bellu
non t’apo nadu chi ses mori-mori.
Ma ses tue ch’as nadu chi a Seddori
ses bénnidu a serrare su cancellu.
Mi paren un’ispétzia ’e minetas:
est signu chi sa morte ti l’aspetas.
- Piredda (49”)
Si sa molte mi ponet a cumprou
de mi ch’’etare da s’ùltima cima,
no est chi a sa molte l’apo istima
e no iseto s’interventu sou.
Deo ch’apo cantadu prima tou,
tocat a mie a mi ch’andare prima,
poi sa molte comente la ideat
ja l’ischit issa a chie che leat.
- Sozu (58”)
Est mezus si sos annos los costois
da chi ses forte de intrar’in bataglia
e a sa morte mùstrali s’iscaglia,
non ti presentes cun penas e ohis
ca poeteddos bi at de mesa taglia
chi sun totu isperende a morrer nois
po àere in su palcu sa cadrea
e faghen: morte tua, vida mea.
- Piredda (51”)
Cand’a cantare ti nde ficas reu
naras su chi ti ’enit a bidea.
A pensas chi sa morte mandat Deu
e non cheret nisciunu s’ora fea?
Poi a regguardu ’e sa cadrea
est mia e mi la juto fatu meu
e non chelzo ch’un’ànima terrena
si che setzat in sa cadrea anzena.
- Sozu (55”)
Antoni, ti connosco chi ses mannu
ma però no ti ch’altzes a sa nue,
ne ti presentes mancu rue-rue
si no a sa Sardigna faghes dannu
ca ue aias sa cadrea tue
àtere si bi ponet un’iscannu.
A pagu a pagu su gradu isvilupat
e intantu su postu tou ocupat.
- Piredda (37”)
A pones mente e la faghes finida
ca sa cadrea cheret rispetada?
A da chi ti l’as tue costruida
ténela tue e ténela onorada,
deo so trabagliende tota vida
po custa cadreedda istraessada.
Però non sunu totu chi cumpeten:
sos chi cheren cadreas si nde feten.
- Sozu (55”)
Non tenzas custa vana illusione
chi durat sa cadrea eternamente,
mancari nois po ambitzione
l’amos nadu in passadu e in presente.
Ue fin Sassu, Piras e Tucone
como bi est cantende àtera zente
e cunservende sun su sardu cantu:
an a fagher po te ateretantu.
- Piredda (51”)
Non ti poto ammitire sa rejone
ma ti devo torrare sa risposta:
mi tocat de ti fagher facia tosta
s’arrejonas de calchi campione.
Sa cadrea de Piras e Tucone
pensa ch’in altu meda che l’an posta:
bi nd’at paritzos nanos chi l’invocan
ma nisciunu b’arrivit ne la tocan.
- Sozu (59”)
Deves bistare atentu a su chi naras,
deo non so ’eninde a cumpromissos.
No at mai esistidu tronos fissos
ca las movet un’àteru sas laras:
ue prima cantende bi fin issos
como àtere bi at faghinde garas
e sighinde s’insoro facultade
mancari ’e diferente calidade.
- Piredda (48”)
O Peppe, canta si nde tenes gana
ma a su chi ses nelzende dae mira.
No est chi deo nde tenza un’ira
o chi nde tenza gelosia umana
ma in su palcu s’’idian a Pira
sa zente fiat tota risulana.
Sos chi bi sunu tenta ’e che los frànghere:
non rien, chi los faghen a piànghere.
- Sozu (57”)
Est mezus si sas armas las retiras
e de cosas allegras mi faedda.
Tue sas festas sardas ja las giras
e non los bides in fascia niedda:
benin a ue est Sozu cun Piredda,
non sun pensende a Sassu e ne a Piras
ca diat esser totu a los ofèndere
a b’andare sos moltos a intèndere.
- Piredda (48”)
Si leas sa rejone dae fundu,
Peppe, no arrejonas a s’iscuru.
Cando faeddas, faedda seguru
s’est chi ses de su giustu sidibbundu:
cando est bessidu a cantare Remundu
mi’ chi fia cantende deo puru.
Deo apo fatu custu e issu cudda,
duncas no apo ereditadu nudda.
- Sozu (54”)
M’abbizadinde ’e cantu tenes toltos
da chi sa festa non pones in brios.
Sos chi nos ana dadu sos adios
in paradisu an a esser acoltos
però sos bios bistan cun sos bios
e no si ch’an andare cun sos moltos.
Siat ocannu o ocannu chi ’enit
andare cun sos moltos non cumbenit.
- Piredda (53”)
Si sa rejone la miras cumpreta
Piredda in dogni lìmite che passat.
Però sa veridade est una e neta
e comente crês tue non s’iscassat
e l’ischis sa cadrea ’e su poeta
tenet sa fama chi in su mundu lassat.
E ponìdeche a palte su buldellu
prit’a bi lis tocare no est bellu.
- Sozu (54”)
T’apo nadu est sa morte una cundanna
ma non morit nisciunu ’e su dolore
e-i su ferru ’e caddu in dogni janna
non ponzas da ch’at mortu un’autore.
Da chi no est una cadrea manna
bi nde dêt aer una pius minore
po lu sighire ’e sas garas su motu
e-i sa zente divertin etotu.
- Piredda (52”)
Cand’a cantare sas laras abberis
faghes de t’iscultare sa proveda
ma si giramos sos ojos a deris
ti pago cun sa própia moneda.
Mi’ chi Dante no este moltu deris
puite est moltu dae tempus meda
ma non ch’at in sa terra unu cantante
ch’apat tocadu sa cadrea ’e Dante.
- Sozu (54”)
Ue che jughes sa conca istasero?
Deo non chelzo fagher s’arrogante.
Mì’ chi non sunu totu che Omero,
che Tasso, che Vergìliu e che Dante
ma iscriet dognunu in cust’istante
sa poesia non torran a zero.
E non bio serrada sa partida:
si no est gai, non balit sa vida.
- Piredda (50”)
A da chi ti nde ficas a sa rea
ti ses girende che serpente boa.
Deo ammito chi in sa Sardigna intrea
potat bessire calchi leva noa
ma s’an disizu de una cadrea
si deven fagher sa cadrea a coa.
Cussa bi lis ammito ’e bonu coro
da chi la faghen de mérìtu insoro.
- Sozu (55”)
Chi mi cumprendas, Antoni, t’imploro,
lassende istare a Omero e a Dante.
Ti lu repito ancora in cust’istante
e si non mi cumprendes m’addoloro:
a da chi b’at unu postu vacante
si che collocan sa cadrea insoro.
E bistat, manna siat o picoca,
e bistat frimma cant’’e una roca.
- Piredda (36”)
Deo non fato de su punghe e fue
prite tenzo unu calmu galateo.
Custas cosas las naras in totue
però sa realtade no la creo:
tue naras chi non cumprendo deo,
deo naro chi non cumprendes tue.
Com’est a fagher sa detzisione:
chie de nois duos at rejone?
- Sozu (54”)
Antoni, si non lassas s’avolotu
cumbinare ja podes calchi abbusu.
Aplaudinde t’an dadu su votu
però in parte a mie mi as delusu.
Ma si sos mannos si che morin totu
tando non cantat nisciunu piusu
ca non che tenen sa fama in sa nue
a sigundu comente pensas tue.
- Piredda (39”)
Non so fatende perunu abbolotu
antzis chelzo poetas a ndi ’essire
ca si cantende ’i nd’at unu fiotu
sa poesia poden ingrandire.
Poi si m’an aplaudidu totu
fàgheti tue puru aplaudire:
faghe un’otava cantu ’e-i sa mia,
non nde tenzas peruna gelosia.
- Sozu (49”)
Deo no so ’oghende unu lamentu
ch’ap’in chelveddos su tantu ’e su sale.
E gelosia ja no nd’apo tentu
ma t’ispiego it’est sa causale:
fit un’aplàusu ’e incoraggiamentu
a da chi t’ana ’idu andende male.
E po cussu ’e velenu non m’atzendo
ca deo custas cosas las cumprendo.
- Piredda (47”)
Peppe, da ch’asa ’idu cussa grascia
guasi guasi fis pagu cortesu.
Da chi s’est móvidu su centru ’e mesu
e chi de manos as bidu una fascia
e da chi cuss’aplàusu as intesu
nde ses restadu fina a cara bascia.
A rier ti ses postu a lu cuare
però fit risu cantu ’e no crebare.
- Sozu (1’01”)
In aterue, Antoni, t’islancia
ca sos faeddos totu aggiunghen brios.
Non mi …………………..pibios
da chi b’at in su versu calchi mancia
ma ammentatinde chi sos versos mios
los peso deo puru in sa bilancia
e giudicare mi los poto ancora
bonos e malos cando ’essin a fora.
- Piredda (38”)
O Peppe, ti rispeto che artista
ma pone a una palte sa ’errina:
canta sa poesia pius abbista
ca ses poeta dae raighina.
Ma non nelzas chi ses su farmacista
cando pesende est sa meighina
e non faeddes mai a sa lezera
ca ti ndi ’essit de ogni manera.
- Sozu (52”)
Ma iscultende a dogn’ora m’impreo
fina si b’at bisonzu ap’a cumbàtere.
Est trancuillu su meu caràtere
chi nemmancu ’e paura non mi leo
e-i su votu mi lu dao deo
prima ch’a mie mi lu diat àtere.
Si apo votu basciu non mi ofendo,
ch’apo cantadu male lu cumprendo.
- Piredda (52”)
Mi paret cussa puru una mania
ch’in sos pagos poetas si at connotu.
Ammito chi cantende sias dotu
e chi apas perenne poesia
ma si dare si devet unu votu
mi’ ti lu deve dare sa giuria.
Si ti lu dana cussos tando juat:
su chi das tue est débbile e si cuat.
- Sozu (58”)
Non ch’’essas, gherra in su campu ’e Marte
po chi fetat dognunu fine trista.
Deo sos versos mios ponzo in lista,
bonos e malos totu a una parte,
ma da chi non cumprendet un’artista
a ue andat a finire s’arte?
Ca si repitis ja non mi piaghes
a da chi non cumprendes su chi faghes.
- Piredda (44”)
Como jambende ses sos arrejonos
e ti ses apoggende a s’àter’ala.
Ammito chi apas nóbbiles sos bolos
che lughe cando intrat in sa sala:
siguru, chie cantat in sa gala
chi versos bi nd’at malos e nd’at bonos.
Faghe coment’e totu sos cantantes
ma chi sun totu ’onos non los bantes.
- Sozu (53”)
Ma chie ti l’at nadu in custu situ?
In sa rejone lógica mi arreo:
gai impignu perunu non mi leo
chi che pote arrivare a s’infinitu.
Però de totu su chi canto deo
so sempre istadu giùdice e peritu,
prite mancu una vìrgula coizo:
de totu su chi naro mi nd’abbizo.
- Piredda (47”)
Deo non ti lu nego su merìtu
ca ses cantende pulidu e signore
e da poi ses ómine mannitu,
ses fina bonu un’arrejonadore.
Ma a narrer chi ses tue su peritu
mi’, Peppe Sozu, cussu est un’errore:
ca chie iscultat pienu ’e letìtzia
cussos nde poden fagher sa perìtzia.
- Sozu (55”)
Nois ch’’essimos in rejones loscas
a da chi faghes un’àteru brincu.
Como non ses lezeri e ne istincu
poite in labbirintos ti che imboscas?
A l’ischis su frastimu ’e su sossincu
chi narat: “Ancu mai ti connoscas”.
E tando ti rispondo rie-rie
si tue non connosches mancu a tie.
- Piredda (53”)
Com’as fatu un’espressione fea
chi finas a l’intender mi dat pena.
O Peppe Sozu, a cambias cadrea
chi ti ses abbascende sa carena?
Ses che chie ’e ratare at sa ’idea,
bistat sempre ratende runza anzena:
nde ratat chentu si chentu nde agatat
e-i sa runza sua non si ratat.
- Sozu (55”)
Antoni, ses su capu ’e sos Pireddas
ma non ti poto contare unu re.
Michelànghelu at fatu su Mosè
e at cumpresu non fin cosigheddas
ca l’at iscutu a malteddu a su pê
e l’at nadu: “Poite non faeddas”?
E cussu ti dimustrat in cuss’atu
chi aiat cumpresu su ch’at fatu.
- Piredda (48”)
Acant’a mie cun calma arrejona
da chi cussu t’est bénnidu a chelveddu.
Michelàngelo tenet sa corona
da cando adoperadu at s’iscalpeddu
ca su Mosè fit un’ópera ’ona
però li mancaiat su faeddu.
A la ’ides sa proa decorosa
ch’a issu puru mancat calchi cosa?
- Sozu (59”)
Fininde deo, Antoni, ti cossizo:
a su revessu non toches s’istella
si de Sardigna in sas biddas passizo
cun sos collegas totu in cumonella.
Però su primu so chi mi nde abbizo
da chi fato un’otava fea o bella:
mi nde dias eloggiu o non nde dias
ca las cumprendo sas óperas mias.
- Piredda (49”)
Deo puru finende mi dileto,
la fino che a tie volenteri.
Ma da punta ’e sas rocas non mi ch’’eto
non m’illudo che unu cavaglieri,
poi chi tue non ses cossizeri
e cossizos da te non ti nde atzeto.
Si as de cossizare a sos concluos
los podes riselvare a fizos tuos.
Màuru Mura
“Attività realizzata col contributo della Regione Sardegna – IMPRENTAS 2020-2021 LR 22/2018, art. 22”.
Foto: Archivio Domus de Janas
