In Sidney festant s’acabu de s’incungiamentu in domu chi duraiat de prus de tres mesis e mesu: centu e ses dis po sa precisioni.
A pustis totu custus tempus, de mesunoti de eriseru is pub, ristorantis, tzilleris, palestras, piscinas e bibliotecas ant torrau a oberri. Ma non po totus, feti po cussa genti chi at fatu su vacinu.
Funt su setanta po centu is vacinaus, intru de cussus chi tenint prus de seixi annus de idadi, in is prus de is cincu milionis de abitantis de sa capitali de su Nuovo Galles del Sud.
Giumpada custa percentuali su guvernu at decidiu de dd’acabai, sonumancu po is vacinaus, torraus a nai, a s’incungiamentu chi duraiat de s’acabu de su mesi de làmpadas, po mori ca fut crescendu s’impestamentu de sa varianti delta.
Su coronavirus ancora no est bintu in su Nuovo Galles del Sud, e in is urtimas binticuatr’oras si funt tentus atrus 496 impestaus. Mancari si festat po s’acabu de s’incungiamentu, si timit meda chi sa pesta sigat a cresciri. Propriu po custu su sotziu de is dotoris australianus at giai postu is manus a innantis: “Tocat a torrai a oberri a bellu a bellu, chi nde chi no su Nuovo Galles del Sud iat a torrai a biri is spidalis prenus un’atra borta, finas chi is vacinaus funt medissimus”. De arregodai ca in Australia funt ancora proibius is atobius de genti meda e ca ancora is strangius non podint intrai.
In su fratempus su bulletinu regionali de sa Sardigna chistionat de atrus corantatres impestaus nous e dus mortus: un’omini de norantacinc’annus chi biviat in sa provincia de su Sud Sardigna e una femina de cent’annus chi biviat in sa provincia de Tatari. Sighint a calai cussus chi s’agatant in is terapias intensivas (imoi funt doxi, unu de mancu de sa dì a innantis), e cussus chi funt in is atrus aposentus (setantases, unu de mancu innoi puru). Calat de coranta finas su numuru de chini est incungiau in domu, chi imoi funt in totu 1.597.
Màuru Mura
“Attività realizzata col contributo della Regione Sardegna – IMPRENTAS 2020-2021 LR 22/2018, art. 22”.
Foto: https://viaggianza.com/sydney/
