Sighit sa bataglia de sa Sardigna contras sa pesta de su coronavirus. De s’Ogliastra est cumentzau s’indagu de totu sa popolatzioni bofiu de sa Regioni. Funt giai catodixi mila is tamponis fatus e ndi funt bessius a pigliu una sessantina de positivus in totu.
A su matessi tempus sighit puru, finas chi tropu abellu, sa genti chi benit vacinada. Po imoi si pensat a cussus chi trabagliant in is ispidalis sardus. Cun prus pagus de milli vacinus fatus sa Sardigna est a coa de cuasi totu is regionis italianas e peus ant fatu feti sa Calabria e su Molise. In pissu de totus, invecias, s’agatant su Latzio, su Veneto e sa Toscana.
In su fratempus, eriseru in Sardigna eus tentu atrus centusetantaseti impestaus e cuatru mortus, funt crescius finas is ricoveraus in is ispidalis. S’opositzioni in Consigliu Regionali no est de acordiu po nudda de s’indagu chi sa Regioni bolit fairi in totu s’Isula e narat ca non serbit a nudda poita si depiat donai importantzia prus manna a sa vacinatzioni. Po su guvernadori Solinas, a dogna modu, “est importanti meda a cumentzai aici, cun s’operatzioni ‘Sardi e sicuri’, poita si podint segai is cadenas de s’impestamentu, tocat a si fairi cumpudai po responsabilidadi e solidariedadi”.
In s’interi su Consigliu de is ministrus at decidiu de donai atras regulas po sa cida chi andat de su seti a su cuindixi de gennargiu. In su decretu si podit biri ca is dis de su noi e de su dexi ant essi de colori arangiu e is atras dies invecias de colori grogu ma cun regulas unu pagu prus fortis e non s’at a podiri andai in is provincias.
Castienduru beni, de su seti a su cuindixi non si podit andai in perun’atra Regioni foras chi po trabagliu e saludi, ma, a dogna manera totus tenint su permissu de torrai aunia si bivit, ma no in is segundas domus chi s’agatant in atra Regioni o Provincia Autonoma.
Màuru Mura
“Attività realizzata col contributo della Regione Sardegna – IMPRENTAS 2020-2021 LR 22/2018, art. 22”.
Foto: Ignazio Aresu
