Unu o forsis dus annus in Casteddu e a pustis torru a domu. Custu est cussu chi depit airi pensau Tanieli Conti candu est erribau in custa terra de milli ammajos. Cussus chi depiant essiri a su massimu dus annus, funt diventaus seigi. Conti no at bestiu prus peruna maglia a pustis cussa de su Casteddu e non si nde dd’at tirada de pissu ca po issu est comenti sa peddi.
Fut s’istadi de su 1999 candu su Casteddu de Cellino comporat de sa Roma sa metadi de Tanieli Conti. Erribat in Sardigna a pustis ses partidas giogadas cun sa Roma. Si depiat fairi is ossus in Casteddu, giogai de prus e cicai de ponni a una parti is paragonis cun su babbu Brunu, chi de sa Roma e de s’Italia fut unu campioni connotu in totue. Fut unu sangunau grai in Roma.
Invecias su Casteddu po Conti est diventada sa scuadra de totu sa vida sua, e prus de una borta at nau ca: “Su Casteddu est sa vida mia”.
Sa relata cun sa sa Sardigna no est cumentzada beni: partidas legias, naturali tostau e calada in Serie B. Ma, Cellino, creiat in Conti e in su 2000 comporat s’atra metadi de su giogadori. Cuatru annus de serie B, tra pagus artus e meda bascius, faint cumprendiri a is tifosus, ca Tanieli, forsis, fut feti su figliu de Brunu e calencunu cumentzat a pensai ca de prus non podiat fairi.
In s’istadi de su 2004, po meritus mannus de Zola e Suazo, feti po nd’arregodai una pariga, acabat sa Serie B po su Casteddu e po Tanieli. Conti diventat unu de cussus chi calant sempiri in campu e cumentzat a giogai comenti scit: su figliu de Brunu est diventendu mannu, e coidendu at a diventai finas Su Capitanu.
Su Casteddu in cussus annus si sarvat sempiri beni, ma in su 2008 ddu fait in manera spantosa e totu partit de unu gol a s’urtimu segundu de giogu de Conti cun su Napoli.
Lastima manna ca non ddu ant mai lamau po giogai cun sa Natzionali, ma Conti po custu at sempiri nau ca sa Natzionali sua fut su Casteddu.
Conti at bestiu sa maglia de su Casteddu po 464 bortas fendu finas 52 gol (333 partidas in Serie A cun 39 gol, 101 partidas in Serie B cun 8 gol e 80 partidas de Coppa Italia cun 4 gol). Unu de is prus mannus.
Màuru Mura
“Attività realizzata col contributo della Regione Sardegna – IMPRENTAS 2020-2021 LR 22/2018, art. 22”.
Foto: https://www.stadiosport.it/si-ritira-daniele-conti-ultimo-storico-capitano-del-cagliari-66634
