Oi in Casteddu po cuasi trexentus insegnantis e agentis de sa giustissia, chi tenint prus pagu de sessant’annus, cumentzat sa segunda vacinatzioni. A pustis chi su Guvernu, po custus, at frimau su vacinu Astrazeneca, at essi umperau su Pfizer.
“Nisciunu problema – narant de s’Ats – po totu cussus chi in is dis chi erribant tenint s’atobiu po sa vacinatzioni de duas. Chena depiri torrai a lamai o prenotai si podint presentai in sa dì e in s’ora chi giai scint. In s’ora su vacinu ddu ant fatu finas cussus centu citadinus chi sabudu passau ddu depiant fairi e ddu ant depiu spostai”. S’Ats fait finas sciri ca funt erribendu 9.700 vacinus de Moderna e ca po mercuris ndi eus a biri atrus setanta mila de su Pfizer.
Po passai de su Astrazeneca a su Pfizer o a Moderna at nau ca giai finas s’Aifa. “Is studius po su mesturu de is dus vacinus funt segurus”, at nau su presidenti.
Ma is regionis italianas sighint a andai po contu insoru: chini pigat po bonus is fueddus de Aifa e invecias chini si frimat ca bolit cumprendiri meglius.
“S’indicu nostu – narat su ministru de sa Saludi Robertu Speranza – funt craras e cumbidaus totus a ddas sighiri. No est unu contu politigu, no est unu presidenti de su consigliu, unu ministru o unu presidenti de sa regioni chi decidit, ma est sa comunidadi de is scentziaus a ddu fairi”.
In su fratempus in Casteddu si funt isolaus doxi personis cun sa varianti Delta de su Covid-19, chi picigat prus coidendu. Sa matessi varianti at custrintu su guvernu ingresu de Boris Johnson a spostai sa dì de su “Freedom day”, chi passat de su 21 de custu mesi a su 19 de su mesi ch’intrat.
Propriu castiendu sa situatzioni de s’Inghilterra su guvernu italianu est pensendu de ponni in cuarantena totu cussus chi erribant de cussu logu. Eriseru in Sardigna eus tentu 31 impestaus nous.
Màuru Mura
“Attività realizzata col contributo della Regione Sardegna – IMPRENTAS 2020-2021 LR 22/2018, art. 22”.
Foto: https://www.adnkronos.com/pfizer-e-moderna-seconda-dose-dopo-42-giorni-cosa-dicono-gli-esperti_E4Qq9qKn4ttIc04pqVI4G
