E duncas at essi su Belgiu sa scuadra chi s’Italia depit atobiai in is cuartus de is Europeus de fubal!
A pustis chi s’Italia at bintu sabudu, sunfrendu, cun s’Austria, eriseru sa scuadra Lukaku at bintu po 1-0 cun su Portogallo. At nai sa beridadi is portoghesus minesciant calencuna cosa de prus ca su segundu tempus ant giogau cuasi feti insoru, ma est bastau su gol de Thorgan Hazard po tenni arregioni. Imoi is giogus si faint tostaus, no est feti s’Italia chi depit timiri is Tiaulus orrubius, ma po nosu funt prus cussus a depiri timiri is piciocus de Mancini. A parrer nostu su Belgiu tenit una pariga de giogadoris chi funt aberu bravus, su giai cicau Lukaku, De Bruyne e Eden Hazard mascamente, ma non parit de tenni unu giogu spantosu chi possat fairi a timiri.
Po imoi ant giogau cuatru partidas (cun sa Russia, sa Danimarca, sa Finlandia e su Portogallo, bincendudeddas totus, segnendu otu gol e pighendudendi feti unu. S’Italia, sempiri cuatru partidas (cun sa Tuchia, sa Svizzera, su Galles e s’Austria), fendu noi gol e pighendudendi feti unu.
Cun custus numurus, cussa de cenarba est una partida chi non tenit una scuadra chi est prus forti de s’atra. A Mancini giai custu ddi depit fairi prageri ca a su cumentzu su Belgiu fut bista comenti una de cussas scuadras chi podiant binciri chena farta. S’Italia est fendu cussu chi depiat fairi, ma imoi si dda depit giogai ca tenit totu is cartas in regula po podiri binciri custa manifestada. Certu ca sa partida cun s’Austria at amostau finas calencuna cosa chi no andat, ma a airi sunfriu est de importu mannu ca afortiat sa carena. Chi is asulus bincint cun su Belgiu ant atobiai, in sa partida a innantti de sa Finali, sa Francia chi de seguru no at a tenni problemas cun sa Svizzera, chi est parta pagu cosa. A custu puntu non faint a timiri mancu is francesus!
Màuru Mura
“Attività realizzata col contributo della Regione Sardegna – IMPRENTAS 2020-2021 LR 22/2018, art. 22”.
Foto: http://www.correttainformazione.it/belgio-italia-probabili-formazioni-data-orario-amichevole-conte-ritrova-marchisio/81623571.html
