De oi, chi non s’agataus in calencunu logu serrau, podeus tenni sa faci liberta e chena mascherina. Dda depueus sempiri tenni, a dogna manera, sempiri a portada de manu poita abarrat s’obrigu de dda tenni in is logus serraus e obertus puru, chi si ddue agatat genti meda o sinuncas chi non fait a abarrai stesiaus.
Tocat a donai sempiri atentzioni chena fairi comenti de ocannu passau in s’istadi. Massimamenti po curpa de sa varianti Delta, chi parit, po cussu chi narant is scentziaus, cussa chi at a tenni is numurus prus mannus de impestu, a intru de su mesi de austu. Ma non feti po custu tocat a donai crobba. Atentzioni manna tocat a tenni poita ancora sa genti chi at fatu su vacinu est ancora tropu paga: su 30% in Italia e su 25% in Sardigna. Sa segunda dosi est necessaria po si protegiri meglius e no erriscai nudda chi si benit impestau.
“Sa mascherina dda depeus sempiri tenni a su costau comenti teneus is mucadoreddus in sa borsa o in buciaca – arrecumandat Grabieli Mereu de s’Asl de Casteddu. Bisongiat a arregodai ca sa prima dosi de su vacinu serbit unu pagu po sa varianti ingresa, arrespundit prus pagu po sa varianti indiana. A ddas fairi ambas, invecias, serbit meda po non fairi amalaidai malamenti. Po custu tocat a donai atentzioni e a non fairi machioris”.
In Italia sa varianti Delta est crescia de cuatru bortas: in su mesi de maju fut a su 4,2% e imoi, invecias, est a su 16,7. E sa Sardigna non podit erriri meda ca est una de cussas regionis chi dda est sunfrendu de prus.
“Varianti Delta chi est crescendu e pagus vacinus, seus errischendu – narat Giuanni Sotgiu, professori de Statistica medica in s’Universidadi de Tatari –. In Sardigna cun totu sa genti chi est erribendu tocat a donai atentzioni manna, ca sa tropu libertadi de oi podit portai a dda perdiri cras”.
Màuru Mura
“Attività realizzata col contributo della Regione Sardegna – IMPRENTAS 2020-2021 LR 22/2018, art. 22”.
Foto: https://liguriaoggi.it
