S’atobiu de su presidenti de sa Republica Sergiu Mattarella e su presidenti de su Consigliu incarrigau Mariu Draghi est acabau a pustis de un’ora e dexi minutus de fueddus.

“Torru gratzias a su presidenti de sa Republica po sa fidi chi m’at bofiu donai – at nau Draghi – po cicai de fairi su Guvernu nou. Funt tempus dificilis meda. Su presidenti m’at arregodau, ma non ce nd’iat abisongiu, sa crisi sanitaria manna chi seus bivendu chi est grai meda po sa genti, s’economia e sa sociedadi. Partendu de custu si cumprendit ca ci bolint arrespustas a s’artaria de sa situatzioni. Est cun custa spera e cun custu impignu chi arrespundu ca giai a su cumbidu de su presidenti de sa Republica. Binciri sa pesta, vacinai a totus, cicai de donai arrespustas a is problemas de dogna dì de sa genti e cicai de ndi torrai a fairi pesai s’Italia funt is bataglias chi tocat a fairi. Teneus a dispositzioni su dinari de sa UE, s’oportunidadi de fairi meda po sa natzioni castiendu, cun atentzioni manna, su benidori de is giovunus. Cun arrespetu ateretantu mannu ap’a fueddai cun su Parlamentu. Tengiu fidi chi chistionendu cun totu is partidus, is trumas parlamentaris e totu is fortzas de sa sociedadi nd’at a benni a campu un’arrespusta de responsabilidadi a-i cussu chi m’at pediu su presidenti Mattarella. Una borta chi apu chistionau cun totus ap’a nai chi bogliu andai a innanti o nou”.

Mariu Draghi no est ancora calau in campu e is chistionis cun is partidus ant a partiri giai de oi. Ma poita su guvernu de Draghi possat nasciri iant serbiri numurus prus segurus de cussus chi ci funt imoi, ca aici no iat a tenni sa magiorantzia né in sa Camera e nemancu in su Senau. In Montecitorio is votus po Draghi, ponendu in mesu finas cussus de Fortza Italia, funt a su massimu 260 e nd’iant a mancai una sessantina. In Palazzo Madama, invecias, funt, prus o mancu, 130 e nd’iant a mancai una trintina po erribai a 160 chi donant sa magiorantzia.

Tocat a poderai e a cicai de cunvinciri is parlamentaris. Ce dd’at a fairi? Eus a benni a biri in is dis chi ant a erribai!

 

Màuru Mura

 

“Attività realizzata col contributo della Regione Sardegna – IMPRENTAS 2020-2021 LR 22/2018, art. 22”.

 

 

Foto: https://it.wikipedia.org/wiki/Mario_Draghi