Su nomini de Gratzianu Mesina est a intru de is otu bandius prus perigulosus de s’Italia, s’orgolesu est piglioni de padenti de su mesi de orgiolas passau candu depiat torrai in presoni a pustis chi sa cundenna dda iant cunfirmada in su Tribunali. Is carabineris, chi funt andaus a ddu pigai no ddu iant agatau in domu e de cussa dì nudda si scit de eita fini apat fatu. Sa giustissia no at mai acabau de ddu cicai, ma po s’ora no ant tentu peruna nova. Funt in medas – finas chi non si faint intendiri – a nai de ddu lassai in pagi, ca tanti giai at pagau meda in sa vida sua. Non dda pensant a sa matessi manera in sa Diretzioni de sa politzia criminali chi in s’urtimu report chistionat de Mesina, de ominis de mafia, ‘ndrancheta e camorra.
Cun Gratzianeddu ddu est un’atru sardu a intru de custa lista: Atiliu Cubeddu, arzanesu chi est sparessiu de su 1987. In segus si podint ligiri finas is nominis de atrus ominis chi ant prenu is paginas de cronaca niedda, massimamenti su sicilianu Mateu Messina Denaro e su calabresu Orrocu Morabito.
Calencunu podiat pensai chi Mesina si podiat fairi biri, in cali manera non si scit, candu si funt mortas is duas sorris in is mesis passaus, ma sa familia no at tentu peruna nova. Si fueddaiat puru chi Mesina fut chistionendu cun sa giustissia po si fairi tenni a certas cunditzionis, ma parit ca non siat andada aici e a-i custu puntu si depit pensai chi sa bandidura possat andai ancora po tempus meda.
Ocannu Gratzianu Mesina at a lompiri is setantanoi annus e sa vida sua est in tribulia de sempiri, ca nd’at passau prus in presoni che a foras. Ce dd’at fata a si fuiri de presonis meda e po annus e annus su nomini de Gratzianeddu fut su cropecu po dogna pingiada. Pariat chi sa storia sua de bandiu fut acabada in su 2004 candu su presidenti de sa Republica, Ciampi, e su ministru de sa Giustissia, Castelli, dd’iant fatu torrai omini liberu, ma, a bortas, su distinu po calencunu parit sinnau aberu.
Màuru Mura
“Attività realizzata col contributo della Regione Sardegna – IMPRENTAS 2020-2021 LR 22/2018, art. 22”.
Foto:https://www.agi.it/cronaca/news/2020-07-31/mesina-latitanza-rete-aiuti-orgosolo-9300512/
