“Tocat a dda arrespetai, ma mi parit una befa manna”. Custus funt is fueddus de su presidenti de sa Regioni Christian Solinas a pustis chi su Tar at decidiu de lassai sa Sardigna in colori de arangiu, aici comenti iat cumandau su Guvernu. Tandu finas a dominigu chi benit is sardus si poderant totu is arregulas chi balint po is zonas in arangiu, massimamenti cun bar e ristorantis serraus. Tocat a apoderai e po genti meda su benidori si fait sempiri prus nieddu e dificili.
Solinas est dispragiu prus che a totu po is butegas chi non podint oberri in custa cida e fueddat un’atra borta de diferentzias mannas intru de is numurus in Sardigna chi funt sempiri meglius, eriseru, po nai, funt “feti” una setantina is impestaus nous.
Comenti de Solinas dda pensat finas su presidenti de su Consigliu regionali Migheli Pais: “Cussu chi at cumandau su Tar andat arrespetau, ma su cumandu de su Guvernu, chi at postu sa Sardigna in zona de colori arangiu, po nosu est prus che tostau, aici non s’agiudat s’economia de chini trabagliat in atividadis chi ant depiu serrai”.
Atra cosa cussu chi invecias pensant in s’opositzioni, non si ddu mandant a nai e po totus chistionat Franciscu Agus de is Progressistas: “Custu contu si serrat comenti sa sparadorgia de unu film de Tarantino: totu mortus e strupiaus e mancunu chi at bintu. Mi dispragit, non scieis cantu, po is butegheris, chi, ancora una borta, si funt illudius po sa propaganda de Solinas. Sa Regioni, a parrer nostu, at faddiu totu: is tempus, sa manera, s’organizatzioni de fairi sciri is numurus de impestu e cussa de is ispidalis. Airi cicau su Tar fut feti unu modu po fairi biri ca calencuna cosa s’est fata: tiatru, feti tiatru, cun arrespetu mannu po is tiatrantis, giai boddius meda de custa crisi”.
Sa spera est chi de dominigu s’intrit un’atra borta in zona groga e po chini est sunfrendu mudit calencuna cosa.
Màuru Mura
“Attività realizzata col contributo della Regione Sardegna – IMPRENTAS 2020-2021 LR 22/2018, art. 22”.
Foto:https://www.rominamura.it/covid-mura-pd-regione-sardegna-e-ministero-salute-facciano-ulteriore-riflessione-su-zona-arancione/
