Mariu Brugnera est nasciu in Venezia su 26 de frairgiu de su 1946. At acapiau sa storia de giogadori de fubal a su Casteddu, ma at giogau finas po sa Fiorentina e su Bologna, po tempus pagu. Cun su Casteddu at bintu su scudetu de su 1970 gioghendu 19 partidas e fendu tres gol. “Cussa scuadra fut forti a beru, non si nd’at torrau a biri aici e at essi dificili a ndi biri atras. Fut fata de giogadoris bravus cun sa bocia e chi Riva non si fut strupiau, facili chi binciaus su scudetu s’annu infatu puru. Fustis amigus e, in campu, cumprendiaus totu feti castiendunosì”, at sempiri arregodau Brugnera.

Comenti de giogadori nde ddu at pesau su Nettuno de su Lido de Venezia, ma est sa Fiorentina chi ddu at fatu giogai in Serie A po prima. In Firenze est abarrau po cincu annus, gioghendu de atacanti po 71 bortas e fendu 23 gol). In Toscana, po fairi cumprendiri a is prus giovunus cantu fut bravu, benit annomingiau Piccolo Di Stefano, unu de is giogadoris prus mannus de dogna tempus! Cun sa Fiorentina bincit una Coppa Italia e una Mitropa e in su 1967 fait 13 gol. Prus de Brugnera cuss’annu iant segnau feti genti che Riva, Mazzola, Altafini e Hamrin.

In s’istadi de su 1968 su Casteddu ddu comporat, paris a Erricu Albertosi, donendu in cambiu Franciscu Rizzo e de tandu, chi ndi tiraus su campionau 1974-75 chi ddu bivit cun sa maglia de su Bologna, acapiat su nomini a sa storia de su Casteddu. Diventat una bandela e cun su Casteddu giogat po 12 annus, a innnati de atacanti, a pustis in mesu campu e in difesa. Cun sa scuadra de sa capitali sarda giogat 227 bortas in Serie A fendu finas binti gol e po 101 bortas in Serie B cun 13 gol.

“A su cumentzu sa Sardigna ti parit atesu, ma candu dda connoscis beni ddi bolis beni e non ti ndi bolis prus andai. Est totu bellu innoi, ma est sa genti chi tenit su donu de ti fairi intendiri speciali”, at nau Brugnera prus de una borta.

At acabau de giogai cun su Carbonia in su campionau 1982-83 e de tandu at sighiu a biviri in Casteddu.

 

 

Màuru Mura

 

 

 

“Attività realizzata col contributo della Regione Sardegna – IMPRENTAS 2020-2021 LR 22/2018, art. 22”.

 

 

Foto: http://www.pesmitidelcalcio.com/viewtopic.php?f=19&t=2384&view=previous