De cras si podit agatai in totu is ediculas su numuru nou de Làcanas. Custu chi bessit est su numuru norantases, e a chini est in palas a custa rivista galana non parit beru.
Custu numuru s’oberit cun d’una intervista a Ambra Pintore, chi nosi contat unu pagu totu cussu chi at fatu e faidi. Ambra est finas in copertina, de seguru est una chi si ddu minescit.
Tonino Oppes, maistu de giornalismu, scrit, cun fueddus durcis e sabius, un’arregodu de Pàulu Pillonca a pustis tres annus de sa morti. Franciscu Oggianu arregodat unu grandu omini de scritura e giornalismu chi si nd’est andau de pagu: Salvatore Sechi. De pagina in pagina si sighit cun d’unu bellu contu in pissu de unu murale de Lula scritu de Maria Teresa Rosu e Lucia Cossu nosi chistionat de su libburu, bessiu de pagu, de Anthony Muroni.
Ornella Demuru, femina balenti de su Mandrolisai, nosi chistionat de s’era digitali e Angelica Fadda, atra femina balenti de sa Marmilla, invecias de unu Podcast cun is poesias de su babbu. Banne Sio, orgolesu, donat atentzioni a su PAC pro su 2021-22 e girendu is paginas agataus un’atra borta Lucia Cossu chi scrit de Isperas e su festival StoricaMente.
Vittoria Campus, atra prenda donosa de sa terra nosta, fueddat de unu campioni de su mundu de tiru a bolu: Luisu Lodde. Manola Bacchis, cun pinna diliga, donat crobba a su mundu de sa scola e Giacomo Pisano, invecias, chistionat de su film L’Agnello.
Una pariga de mesi a oi est mortu unu de cussus ominis chi depiaus tenni in dogna bidda sarda: s’ussassesu Paulu Concu e Antonella Loi, mastra, cussa puru, de giornalismu ddu arregodat in is paginas de Làcanas.
In custu numuru boliaus cumentzai a fueddai de contus chi in sardu ddi chistionant pagu, eus agatau unu piciocu de Lunamatrona, Mateu Tuveri, e ddu eus fatu scriri de fisica in limba.
A pustis totu is articulus si podint agatai totu is rubricas chi funt in dogna numuru de Làcanas: in bidda est intregada a sa Reina de sa Marmilla: Lunamatrona; Spicchi d’arte, de Tonino Oppes, nosi fait connosciri is artistas Mariu Zedda cun Anna Baches; sa poesia est de Maria Teresa Rosu; Marengos de Juanne Fiore, Intzerta de Giambachisio Serra, Favulas de Giancarlo Secci, Subra su palcu cun Antoni Piredda e Pepe Sozu, Ervas de Luciana Lapia Piredda.
Màuru Mura
“Attività realizzata col contributo della Regione Sardegna – IMPRENTAS 2020-2021 LR 22/2018, art. 22”.
Foto: Archivio Domus de Janas
