Po imoi no est in sa mesa de su Guvernu su pensamentu de serrai totu e in totu s’Italia. Est cantu narant medas chi funt a intru de is ministerus. Su Cts, chi eriseru at chistionau a favori de serrai massimamenti in is fini de cidas, non at pediu unu incungiamentu po totus, finas poita in custu tempus si bivit una situatzioni diversa po is Regionis.

Perunu incungiamentu duncas, ma un’atra strinta at erribai a intru de custu finas de cida, comenti ant pediu is espertus. S’impestamentu de sa genti, cun is variantis chi funt eribadas, crescit e sa cosa chi arriolat de prus est su numuru de sa genti in is terapoias intensivas e in is atrus aposentus.

Prus limitis de si moviri finas in is zonas grogas; serrada in su fini de cida, comenti in Paschigedda, candu totu is logus diventaiant orrubius, zonas orrubias prus tostadas po totus, comenti est sussedendu in Codogno, aunia sa varianti brasiliana e sudafricana funt presentis in numurus artus. E s’at a puntai, prus che a totu, a is vacinus chi bolint fatus a prus genti possibili e in tempus prus curtzus. Custas arregulas nos ant acumpangiai finas a Pasca Manna e is espertus fueddant, craru e tundu, de cambiai colori, donendu atentzioni cida pro cida,  a is Regionis chi tenint 250 impestaus nous dogna centumila abitantis. Po s’ora, in Italia, funt in zona orrubia custas regionis: Basilicata, Molise e Campania. Cun cussu chi proponint is espertus de su Cts iant cambiai colori atras seti regionis: Marche, provincia de Trento, provincia de Bolzano, Lombardia, Emilia Romagna, Piemonte e Friuli.

Mesuras chi po imoi non iant depiri interessai sa Sardigna, ca is impestaus nous funt coranda dogna centu mila abitantis, finas chi a innanti funt 30. Chi si giumpant is cincuanta torraus in zona groga. Mai Deus ddu bogliat, sigheus a ponni sa faciola e a abarri a sa stesiada!

 

Màuru Mura

 

 

“Attività realizzata col contributo della Regione Sardegna – IMPRENTAS 2020-2021 LR 22/2018, art. 22

 

 

 

Foto:https://www.fanpage.it/politica/arriva-il-nuovo-dpcm-restrizioni-fino-a-pasqua-resta-sistema-dei-colori-come-cambiano-le-regole/