“A intru de s’istadi vacinaus totu is italianus chi ddu bolint”. Una impromintzia manna cussa de su ministru de sa Saludi Roberto Speranza chi ddu narat in televisioni, in sa trasmissioni de Lughia Annunziata, Mezz’ora in Rai Tre.

Is tres mesis chi erribant, cussus chi andant de su primu de arbili a su trinta de làmpadas, funt cussus chi contant de prus po sa vacinatzioni, “nos aspetaus chi erribint sonumancu cincuanta milionis de dosis chi ant a serbiri po sa metadi de is italianus”, narat sempiri su ministru.

S’Italia, in su fratempus, a un’annu de su primu incungiamentu in domu, giumpat is centumila mortus de Covid. Cun is 318 mortus de is urtimas binticuatru oras imoi seus bessius a 100.103 in totu. Is impestaus nous, ligendu su bulletinu de su ministeru de sa Saludi, funt 13.902 chi faint bessiri a 3.081.368 in totu de su binti de friargiu de ocannu passau. Sa genti chi, invecias, est sanada, chistionendu sempiri de s’urtimu bulletinu, est cuasi cantu is impestaus nous : 13.893. Po custu, de un’annu a-i custa parti eus tentu 2.508.732 sanaus. Cussu chi arriolat de prus funt is numurus de is ispidalis: teneus 2.700 personis in terapia intensiva e 21.831 in is atrus aposentus. Is regionis italianas cun is numurus prus artus de eriseru funt s’Emilia Romagna cun 2987, sa Lombardia cun 2.301, sa Campania cun 1.644, su Piemonti cun 1.214, su Lazio cun 1.175 e sa Toscana cun 1.000.

Funt sessantotu, invecias, is impestaus nous in s’Isula de Sardigna e si contat finas unu mortu. In sa terra nosta is malaidus de Covid-19, de ocannu passau, funt bessius a 41.813 e is mortus ant giumpau is milli de tempus meda: 1.184.

Is terapias intensivas bint sa presentzia de binticuatru sardus e in is atrus aposentus ndi agataus atrus centunoranta. Su numuru de sa genti incungiada in domu est de 12.444 e is sanaus in totu funt 27.786.

Is impestaus sardus funt aici dividius in su territoriu: 10.088 in sa Citadi Metropolitana de Casteddu, 6.679 in su Sud Sardegna, 3.501 in sa provincia de Aristanis, 8.252 in cussa de Nugoro e 13.293 in Tatari e provincia.

 

 

Màuru Mura

 

“Attività realizzata col contributo della Regione Sardegna – IMPRENTAS 2020-2021 LR 22/2018, art. 22

 

 

Foto: https://www.torresette.news/24-news/2021/03/05/coronavirus-italia-il-bollettino-del-5-marzo-oltre-24-mila-nuovi-casi-297-decessi