Su giornalismu sardu prangit unu de is figlius prus capassaus: si nd’est andau Pieru Mannironi, firma storica de su giornali La Nuova Sardegna. Comenti de giornalista iat sighiu totu cussu de importu chi est sussediu in Sardigna in is urtimus corant’annus. Teniat sessantaset’annus e fut nugoresu, ma de tempus meda biviat in Tatari. De cinc’annus in pensioni, no iat mai lassau sa pinna e iat sighiu a trabagliai comenti sempiri scriendu liburus puru. Difatis ocannu passau fut bessiu “Anime Maledette” chi at tentu is favoris mannus de is ligidoris.

In sa Nuova trabagliaiat de su 1981, a innantis comenti de capu redatori in Nugoro e a pustis comenti de inviau. Podeus nai, chena farta, ca Nugoro e sa Sardigna perdint unu de is figlius prus balentis: chini dd’at connotu in vida o feti ligendu su chi scriat in su giornali nd’at a podiri feti chistionai beni ca fut omini de gabbale, unu de cuss’ominis chi andant arregodaus in su benidori po su esempiu chi at donau in vida e in s’arti sua. Arrespetau de totus, sa firma sua est sempiri stetia garantzia de seriedadi, comenti iat essi po totu is giornalistas.

Medas is indagus chi s’arregodant de Mannironi: de is missilis nuclearis chi s’agataiant in La Maddalena in su tempus de sa “Guerra Fredda” a s’indagu in pissu de sa basi militari de Quirra, finas a passai a una pista, chi nemus iat cicau, in pissu de su fogu de sa Moby Prince o a s’arcanu de s’elicoteru Volpe 32 orrutu chena perunu motivu.

De su cumentzu de s’annu at tentu problemas cun su Covid-19, ma a pustis airi passau tempus in s’ispidali pariat sanau. A dolu mannu funt erribaus atrus problemas chi ddu ant mortu. Est stetiu presidenti de s’Associazione della stampa sarda de su 1988 a su 1992.

De s’apilurtzai cussu chi si ligit in su giassu de La Nuova Sardegna: “È un giorno tristissimo per il mondo dell’informazione della Sardegna che ha perso improvvisamente uno dei suoi più alti rappresentanti, un vero giornalista d’inchiesta come raramente si è visto nella nostra isola. È un giorno tristissimo in particolare per la Nuova Sardegna, che ha perso il suo più grande inviato, un cronista di razza che ha sempre considerato il proprio lavoro una missione al servizio dei lettori e della verità. Non è una frase retorica, soprattutto perché con Piero Mannironi il giornalismo sardo ha perso una figura di un’umanità profonda quanto rara in questo mestiere”.

Mannironi lassat sa pobidda Daniela Scano, giornalista issa puru in sa Nuova, e is figlius Bianca, Antoni e Claudia.

 

Màuru Mura

 

 

“Attività realizzata col contributo della Regione Sardegna – IMPRENTAS 2020-2021 LR 22/2018, art. 22”.

 

 

 

Foto: https://www.google.it/url?sa=i&url=https%3A%2F%2Fwww.corrieredisciacca.it%2Flutto-cittadino-oggi-a-sciacca%2F&psig=AOvVaw0ILYRW_cndWGdrrRVxzqLE&ust=1613819713667000&source=images&cd=vfe&ved=0CAIQjRxqFwoTCIDQ8Ynp9e4CFQAAAAAdAAAAABAE