A pustis sa partida perdia cun su Torinu, cenarba passada cun gol de Bremer po sa scuadra de Nicola, Giulini at decidiu de cambiai s’allenadori. Erribat Lionardu Semplici, giai allenadori de sa Spal ocannu passau. Sa partida cun su Torinu est stetia una de is peus chi su Casteddu at giogau, bastit a pensai ca Sirigu at depiu fairi feti una parada.
C’at de nai ca su presidenti de su Casteddu iat nau, in segus a sa partida perdia cun su Genoa a metadi de su mesi passau, ca chi si depiat calai in Serie B si nci calaiat totu paris cun Di Francesco, e po custu iat allonghiau su cuntratu de s’allenadori abruzesu. Ita est sussediu? Is fueddus non balint prus? In su mundu de su fubal est aici de una vida, ndi eus bidu e intendiu de dogna colori! At essi Semplici a cicai de sarvai su Casteddu chi imoi s’agatat a cincu puntus de su Torinu. Galu no est perdiu nudda e is ominis po cicai de torrai a bessiri in classifica ci funt: pagus scuadras tenint is giogadoris de calidadi chi funt in Sardigna. Tocat a ndi bogai sa barra e non si cumprendit chi genti comenti de Simeone o Pavoletti non arrennesciant prus a fairi gol. At essi po is schemas de giogu de Di Francesco? Eus a benni a biri comenti cambiat, in is ominis e in is schemas, su Casteddu de Semplici. S’allenadori toscanu est unu de is meglius chi si podiant cicai, personi seria e capassa, bastit a s’arregodai ca ce dd’at fata a portai sa Spal de sa Lega Pro a sa Serie A in dus annus.
Sa classifica prangit meda, funt pagus is puntus, ma a innanti non parit chi is scuadras currant de prus: cun duas o tres vitorias de sighiu, e custu Casteddu ddas podit fairi, sa positzioni iat a cambiai meda.
Certu ca Di Francesco no at tentu fortuna manna e forsis non at cumprendiu meda de is giogadoris chi teniat, ma imoi is giodadoris non tenint prus peruna scusa: su Casteddu ddu depint sarvai cussus cun s’agiudu de s’allenadori nou!
Màuru Mura
“Attività realizzata col contributo della Regione Sardegna – IMPRENTAS 2020-2021 LR 22/2018, art. 22”.
Foto: http://www.ischiablog.it/index.php/sport/lallenatore-della-spal-leonardo-semplici-a-ischia-per-parole-di-calcio/
