In Palazzo Madama, eriseru, Mariu Draghi s’at pigau sa fiducia. A ddi nai ca giai funt stetius in 262, centu prus de cussus chi serbiant, invecias, a ddi nai ca nou feti coranta. In dus no ant votau nudda. In su Senau, duncas, su guvernu sa magiorantzia est manna de averas, ma non cantu fut cussa de su Guvernu Monti, aunia a nai ca giai furint stetius in 281. A nai ca nou, in prus de is dixianoi de Fratelli d’Italia, funt stetius atrus cuindixi senadoris de is Steddaus, chi funt prus de is dexi chi si pensaiat. Atrus otu de is Steddaus no funt in aula ma de dus de custus si sciat giai. Su caputruma de is grillinus Ettore Licheri at chistionau de eita tenit in conca de fairi nendu: “Presidenti non dongiat mai po certu su eja de nosu, poita nosu di segaus is scatulas, e di pedu scusa po fueddus aici grais”. Sa votatzioni est erribada a pustis d una dì longa longa chi fut cumentzada cun is fueddus de Draghi. Oi, su guvernu, at essi in Montecitorio po cicai de si pigai sa fiducia in cue.

Su presidenti at nau ca “s’unidadi de totus no est unu scioberu, est unu doveri”. Su presidenti beciu de sa Bce at chistionau po cincuantatres minutus e is senadoris dd’anti batiu is manus po bintunu bortas. Est partu emotzionau e s’est bidu candu at faddiu is numurus de sa pesta de su Covid. De cussu chi at nau is cosas de fairi allestru e cun atentzioni prus manna funt su mundu de sa scola, is vacinus (“Tocat a coidai”, at nau), s’ambienti, s’atentzioni po s’Italia de basciu e su turismu. Propriu chistionendu de turismu custus funt is fueddus chi at umperau: “Una de is primas cosas chi depeus torrai a oberri, a pustis airi bintu sa pesta, est su turismu. Tocat a agiudai chini trabagliat in cussu campu po cicai de non ddus fairi serrai. Ponni dinari in su turismu no est a ci ddu fuliai, ma est dinari chi at a torrai in su benidori, e coidendu puru”.

 

Màuru Mura

 

 

“Attività realizzata col contributo della Regione Sardegna – IMPRENTAS 2020-2021 LR 22/2018, art. 22”.

 

 

 

Foto: https://www.linkiesta.it/2021/02/testo-integrale-discorso-mario-draghi-senato/