Si serrant cun coranta medaglias is Olimpiadis de s’Italia in Tokyo. Mai in peruna atra Olimpiade is italianus iant fatu aici beni: dexi de oru, su matessi de prata e binti brunzus. Dogna dì sonumancu un’italianu at bintu una medaglia.

Is asulus serrant comenti de decimus a s’acabu de is giogus, cun su matessi numuru de orus, ma cun de mancu de medaglias de prata de is Paesi Bassi, Germania e Francia. Pighendu in contu su numuru de is medaglias s’Italia erribat setima, primu Stadu de sa Unioni Europea.

Un’arresurtau spantosu, cun calencunu sport chi, in is annus a innantis, iant ingustua e custa borta non ant fatu su doveri insoru comenti sa scherma. Deludentis finas is sport de scuadra aunia s’Italia est bessia a is cuartus cun sa pallavolo de is mascus e de is feminas.

A fairi arregodai, po sempiri in is annus, custus giogus funt massimamenti is medaglias de oru erribadas de s’atletica cun Jacobs in is centu metrus, chi est sa gara prus connota de is Olimpiadis e de sa stafeta 4×100 cun is sardus Tortu e Patta chi cun Jacobs e Desalu ant fatu allirgai totu is tifosus. Mancu in is pensamentus meglius faiat a creiri una cosa aici.

De arregodai po annus finas sa medaglia de oru de Tamberi in su sartu in artu e cussas in sa vela e in is artis martzialis, chena ponni a un’ala s’oru in su ciclismu e cussa de su canotagiu de is feminas.

In Rio, in su 2016 is italianus si furint frimaus a bintotu medaglias e mancuna fut erribada de s’atletica.

In sa classifica finali de is medaglias is Stadus unidus funt erribaus primus cun 113 medaglias (39 de oru, 41 de prata e 33 de brunzu). A is palas de is americanus agataus sa Cina, sighia de su Giapone, Gran Bretagna, Comitato Olimpico Russo e Australia.

In Tokyo funt 93 is stadus a airi bintu sonumancu una medaglia e spantosas funt cussas de San Marino chi at bintu tres medaglias (una de prata e duas de bruzu), comenti mai ddi fut sussediu a innantis.

 

 

Màuru Mura

 

 

“Attività realizzata col contributo della Regione Sardegna – IMPRENTAS 2020-2021 LR 22/2018, art. 22”.

 

Foto: http://mondiali.net/75275-olimpiadi-tokyo-2020-il-calendario-completo-delle-gare/