Su sindigu Eliu Mulas de Bono, bidda sarda de su Goceano, serrat sa bidda, finas a su ses de martzu a pustis is cincu impestaus de sa varianti ingresa de su Virus. Serradas totu is butegas foras de is stangus, is edicolas is potecarias e is butegas de cosa de papai, chi, a dogna modu, ant abarrai serradas in su dominigu. Serrant finas parcus, campusantu e scolas e is bar cun is pitzerias podint bendiri feti portenduru sa cosa in domu de chini comporat. Trabagliant is muradoris. S’ordinantzia at fatu inchietai, non si scit cun cali diritu, Vitoriu Sgarbi chi at umperau fueddus de feli contras Mulas: “Comenti si podit impestai sa genti in foras de domu? Seus in manu a is macus, su sindigu de Bono narat sciollorius”.
At segau in curtzu su sindigu, lassendu orruiri sa chistioni, chena fairi peruna cuntierra. Su sindigu no at bofiu arrespundiri a is fueddus de Sgarbi e at sighiu a sa litara su diciu sardu “A fueddus macus, origas surdas”, ma at chistionau su matessi: “Non tengiu peruna intentzioni de arrespundiri. Imoi, comenti de sindigu m’intendu sa responsabilidadi manna de sa saludi de is citadinus de Bono, tengiu atra cosa in conca”.
In su fratempus in Sardigna eriseru eus tentu atrus setantaseti impestaus de su Covid-19 e atrus cincu mortus cun 25.403 tamponis. Funt, a-i custu puntu, 264 cussus chi s’agatant in is aposentus de is spidalis e 27 de custus funt. a intru de is terapias intensivas. Is sanaus bessint a 26.252.
In s’Isula, is impestaus, de un’annu a imoi, funt aici dividius: 9.644 in sa citadi metropolitana de Casteddu, 6526 in su Sud Sardigna, 3.454 in Aristanis, 8.114 in sa provincia de Nugoro e 13.027 in cussa de Tatari.
Cun custus numurus, in Sardigna, si cumentzat a chistionai de torrai a oberri is bar e is ristorantis finas a is dexi de noti, eus a benni a biri ita ndi bessit a pigliu!
Màuru Mura
“Attività realizzata col contributo della Regione Sardegna – IMPRENTAS 2020-2021 LR 22/2018, art. 22”.
Foto: Archivio Domus de Janas
