Sa Regioni Sardegna fait sciri ca funt binti in prus is positivus a su Coronavirus, ma, e custa est sa nova galana, mancu unu mortu. Po s’ora, e spereus po tempus meda, is mortus abarrant otantasesi e is impestaus bessint a 1.198, contenduru, comenti de sempiri, mortus e sanaus. Propriu custus urtimus, atra nova de importu mannu, sighint a cresciri: cun is cincu de s’atra dì imoi funt 231. In Sardigna is tamponis fatus ant giumpau is catodiximila. Su numuru prus mannu de is positivus funt acorraus in domu, 746, atrus 135 funt in is aposentus de is ispidalis e de custus bintitres s’agatant in terapia intensiva.
Is sardus positivus funt aici dividius: 212 in Casteddu e in is orus, otantases in su Sud Sardegna, corantunu in Aristanis e provincia, setanta in Nugoro e provincia, 789 in Tatari e Provincia. De nai ca de is binti positivus nous, cuindixi funt propriu in su sassaresu, chi abarrat sa zona prus boddia de su Coronavirus in s’Isula nosta.
Foto: “Su turismu non si frimat”, narat su ministru Franceschini
