“Is vacantzias non funt in perigulu, no ant essi ogualis a prima de seguru. Is italianus ndi tenint abisongiu”.
Ddu at nau su ministru de su Turismu Dariu Franceschini. Comenti ant essi atera cosa su ministru non ddu scit nai: “Est dificili meda a nai cosas seguras, in custu tempus. Apu pregontau a is scentziaus de donai, cantu possibili a innanti de s’istadi, is mesuras prus giustas. Non depit essiri sa politiga o is meris de is stabilimentus a ddu nai, ma teneus abisongiu de genti chi ndi cumprendat. Bogliu feti chi ddas dongiant in tempus poita, de s’atra parti, ddu at genti chi depit aprontai su trabagliu”.
“Su turismu, in Italia, est una industria chi tenit su 13% de su Pil – at aciuntu su Ministru – forsis est sa prus importanti de sa natzioni, duncas tocat a fairi de totu po sarvai cussu chi podeus”.
Galu: “Est facili a pensai ca s’istadi chi benit pagus strangius ant a benni de nosu, ma finas is italianus ant a viagiai meda prus pagu foras de Italia. Seus trabagliendu po donai agiudus a chini bivit de turismu e seus fendu de totu po ddus donai a is familias chi non tenint dinari meda po si fairi is ferias. Is italianus, a pustis totu custus sacrificius, ndi tenint abisongiu”.
Foto: https://it.wikipedia.org/wiki/Turismo_in_Italia
