Is numurus bonus sighint a bessiri in Italia. Calant, de unu pagu, is malaidus nous e is impestaus puru s’abasciant po sa cuarta dì de sighiu. Calant finas cussus chi s’agatant in terapia intensiva e, bella nova custa, cussus chi funt in is ispidalis.
Totu custu, comenti dogan dì, si ddu fait sciri su capu de sa Protetzioni Civili, Angilu Borrelli. Is malaidus in Italia funt in totu 94.067, feti 880 in prus de sa dì prima, chi bolit nai ca funt mancu de sa metadi de sa dì de lunis candu si fut erribau a 1941. Est su numuru prus basciu de su 10 de martzu a imoi.
In totu is impestaus, contenduru mortus e sanaus, funt erribaus a 135.686, 3039 in prus de sa dì innanti candu funt stetius 3599.
De is malaidus, 3792 s’agatant in terapia intensiva, a dogna manera funt 106 de mancu de sa dì innanti, 28.718 funt in is ispidalis e 61.557, invecias, in domu isolaus de totus. Abarrat artu su numuru de is mortus, 604 (sa dì prima 636), e aici si giumpant is 17mila in totu de candu est incumentzada custa cuntierra.
Medas is sanaus chi ant giumpau is 24mila.
Foto: https://www.corriere.it/salute/malattie_infettive/20_aprile_06/coronavirus-italia-132547-casi-positivi-16523-morti-bollettino-6-aprile-3fdc3f38-781c-11ea-98b9-85d4a42f03ea.shtml
