Funt erribaus eriseru a merì adduru de sa Cina is dotoris e su materiali po agiudai s’Italia a binciri sa guerra cun su Coronavirus. Unu Airbus A-350 de sa China Eastern chi est partiu de Shangai at tocau terra in Fiumicino. Aintru de s’aparechiu ventiladoris, materiali respiratoriu, eletrocardiografus, mascherinas e atras cosas mandadas de sa Croci Orrubia Cinesa a-i cussa italiana, chi in parti ddus at a donai a su guvernu e in atra parti invecias a is volontarius impignaus in custa emergentzia.
In pissu s’agatant finas 9 dotoris, ses ominis e tres feminas, su numurus dus de sa Croce Rossa Yang Huichuan e de su professori de rianimatzioni po coru e prumonis Liang Zongan. Est totu genti chi at trabagliau, beni meda, in s’emergentzia in domu insoru.
“Custu est cussu chi si narat solidariedadi e soi seguru chi nd’at erribai atra puru. Non seus solus, c’at genti meda chi bolit agiudai s’Italia”, at nau Di Maio in Facebook, amostendu su videu de s’erribu de s’aereu e torrendu gratzias a s’ambasciadori cinesu. “Atrus ministrus de is Esteri m’ant lamau e m’ant nau chi bolit agiudai s’Italia”, at aciuntu su ministru.
Foto: https://gds.it/articoli/cronaca/2020/03/13/coronavirus-dalla-cina-arrivano-aiuti-e-un-team-di-esperti-fb4820a0-f59c-45ba-ab3e-24d0d3c7515e/
