Torraus a donai is numurus de su coronavirus in Cina: 638 funt is mortus, 31.400 is impestaus e 1.500 cussus dimitius de is ispidalis.
Po s’Italia tocat a nai ca c’est, uficialmenti, su primu impestau. Est unu de is cincuantases italianus chi funt torraus de Wulan e s’agatant in isolamentu in sa tzitadella militari de sa Cecchignola. Su piciocu, unu ricercadori emilianu de bintinoi annus, est in isolamentu a su Spallanzani. Invecias de is trintacincu italianus chi s’agatant in sa Diamond Princess, sa navi de crociera imoi in Giappone, a nemus at picigau calencuna cosa. Est a nai ca finas su cumandanti de sa navi est italianu, de Sorrento. Grai est sa saludi de sa femina cinesa chi cun su pobiddu est ricoverada de otu dis sempiri in su Spallanzani. De issa is dotoris ancora non narant nudda.
In su fratempus de Wuhan erribat sa nova de sa morti de Li Wenliang, su dotori cinesu chi po primu at chistionau de su virus.
Foto: https://www.repubblica.it/cronaca/2020/01/30/news/coronavirus_170_morti_in_cina_mille_nuovi_contagi_ikea_chiude_tutti_gli_store_casi_sospetti_a_roma_e_alessandria-247125245/
