A pustis de is eletzionis regionalis de su Molise de sa cida passada, in custu fini de cida s’est votau finas in Friuli Venetzia Giulia. Comenit in Molise innnoi puru at bintu su centrudresta cun su candidau de sa Lega Massimilianu Fedriga chi est a su cincuantases po centu indenanti de su candidau de su Partidu democratigu, Sergiu Bolzanello chi s’est frimau a su bintiseti po centu. Mali, meda mali, su candidau de is Steddaus chi at pigau su dogi po centu, sa metadi de is votus chi su Movimentu iat pigau in is eletzionis de su 4 de martzu passau. Castiendu is eletzionis passadas tocat a nai ca crescit ancora de prus s’alliantzia de Salvini, Berlusconi e sa Meloni ma crescint finas is democratigus. Tocat finas e a nai, po onestadi, ca a votai po is regionalis e po is politicas cambiat meda.
Bolat su centrudresta e imoi at pediri a bogi ancora prus arta de bolliri guvernai s’Italia puru, sa Lega est cuasi tres bortas su partidu de Berlusconi: trintacuatru po centu po Salvini e su dogi po centu po Berlusconi.
Su candidau de is Democratigus at intzerriau a su telefunu Fedriga po ddi fairi is cumplimentus e at nau a is giorronalistas ca “su centrumanca at poderau e biri ca is Steddaus funt abarraus a palas bolit nai ca eus trabagliau beni in Friuli”.
Foto: termometropolitico.it
