Custu documentu narat de una de sas ùltimas garas de sa vida de Remundu Piras: in Borore, in-d-unu salone, su 28 de su mese ’e Frearzu de su 1978, cun su cumpanzu sou de una carriera, Peppe Sozu. In custas 28 otavas sos duos campiones de su versu a bolu dan un’àtera proa de sa bona muta insoro. A pustis de custa gara, chi amus a imprentare in sas àteras partes puru, Piras e Sozu cantein umpare in Montresta pro Santu Cristolu, su 28 de su mese de Abrile de su matessi annu: cussa est istada s’ùltima de totucantas. Vintitres dies ebbia infatu, su 21 de su mese ’e Maju, Remundu Piras morzeit in Biddanoa. Cando an cantadu in sa gara de Borore, una festa chene santu, Remundu Piras teniat 72 annos e Peppe Sozu 63.  

 

 

 

 1. Sozu (1’32”)

Un’antiga amorosa passione

bos at in custa sala riunidu

tot’isperende ’e bos aer batidu

novas bonas in custa ocasione

continuende una traditzione

chi in sala e in piata azis sighidu.

E nd’’ato cun sos mios versos lanzos

saludos pro locales e istranzos.

 

 

2. Piras (1’05”)

Non tenzo mancu sa presuntzione

de jomper a sos annos de Noè:

deo cando in su palcu ponzo pe’

mi dat sempre una bruta impressione

ma a esser invitadu dae te

est una grande sodisfatzione.

Permiti unu saludu chi ti ofelza

e chi torra ben’àpidu ti nelza.

 

 

3. Sozu (1’29”)

Oe sa zente cuntenta si atretzat

po che pigare a sas sublimes vetas

e bastat de raggiungher cussas metas

su cumprimentu ’e benes nos caretzat:

si che sun imbetzende sos poetas

ma sa traditzione no imbetzat.

Da tantos annos est sighinde a coa:

est imbetzende e parit sempre noa.

 

 

4. Piras (52”)

Sa zente sempre est in chilca’e cucagna,

si ponet dogni tantu in bonumore.

E cando est sidida sa campagna

invocat abba massaju e pastore

però cando est tropu sa sicagna

ja faghet bene fina unu lentore.

E gai ispero in gratzia ’e Deu

chi bos apaghet su lentore meu.

 

 

5. Sozu (1’27”)

Tzeltu chi in sa sicagna faghet bene

finas d’abba si ’enit un’aizu

e custos in s’ispetativa crene

chi sa sorte est bessinde como a pizu:

assazare un’’utiu’e s’Ippocrene

nde so convintu chi an totu disizu

si est abba bundante e saborida

pro consolare sa zente sidida.

 

 

6. Piras (55”)

Est in disusu s’abba’e Ippocrene

ca como est tramontada s’Elicona.

La braman de continu in custa zona

prite an s’idea ’e l’assazare bene

però si no est tantu s’abba ’ona

coment’est est bisonzu chi la lene.

Deo po palte mia los prevenzo

puite ’e abba ’ona no nde tenzo.

 

 

7. Sozu (1’07”)

S’unu trainu curret in sa cora

po bi bufare unu mujat s’ischina.

Per’andende mi paret in malora

ogni funtana frisca e cristallina.

Ma si esserat s’abba genuina

penso sa zente nde chelfat ancora.

Ma abbundantes sun sas abbas malas

e s’abba ’ona arrivat in fialas.

 

 

8. Piras (49”)

Deo so unu pagu taldighinu

e-i s’abba sa vena no mi ’atit

ca so comente e-i cuddu trainu:

a pena faghet caldu luego patit.

Sa pag’abba si finit in caminu

e finas a su mare no b’imbatit.

E gai eo so débbile e connosco

e inue m’iscùrigat mi cosco

 

 

9. Sozu (1’07”)

Ma troulare no podes s’iscena

si no mi paret una cosa istrana.

Chie est naschidu da era lontana

s’istancat dogni briu ’e sa carena:

no est sa zente chi mancat sa gana

penso ch’’eninde mancu est dogni vena.

E sa zente in su càntaru si atzufat

e chie arrivat taldu no nde bufat.

 

 

10. Piras (52”)

Massimalmente cando faghet caldu

chi b’at sididos in su meriagu

totu si cheren primos cun azaldu

ca a bistare a ùltimu dat tragu.

Tzeltu chi chie jompet mesu a taldu

de abba frisca bi nd’agatat pagu.

Si de gana ’e bufare si allicantzat

cussu bufat de cudda chi b’avantzat.

 

 

11. Sozu (1’04”)

Sa cosa est diventende pius dura,

ti lu cunfesso pro s’idea mia.

Si de abba no an una salia

sos ch’arroventan in bula ’e s’arsura

ca po sa vena de sa poesia,

parit, s’est ribbellada sa natura:

chi su ciclu bundante apat concrusu

e no nde naschet manc’unu piusu

 

 

12. Piras (43”)

A Deu si lu cheret no l’est proa

tantu no at sas fortzas in arrimu.

S’abba mala a sas boltas ch’’essit primu,

sa pius bona ja restat a coa.

Deo mancari ’etzu mi so frimu:

s’abba mia mi paret sempre noa.

A boltas la carigno e mi nde jogo

e-i sa mezus a ùltimu ’ogo.

 

 

13. Sozu (1’04”)

Ma no cumprendes si, Remundu, ancora

nos apretzat sa populatzione

ca no est ispuntende unu brione

chi diet vida a s’imbetzada flora

ca deo penso po nois fit s’ora

de nos aer mandadu in pensione.

E nos invitan ca mezus no ana:

nos deven iscultare a mala gana.

 

 

14. Piras (41”)

Deo no lu cheria cuss’onore

ne penses sa domanda chi la feta.

Ancora juto s’ischina ’ereta

po chi non sia in su mezus fiore:

pensionadu che coltivadore

m’ana, ma no ancora che poeta.

Ancora su tribbutu meu ofelzo:

de cussas pensiones no nde chelzo.

 

 

15. Sozu (1’01”)

Si est a la pensare a sa ’ereta

ja si risolvet in-d-unu minutu.

A ti pensionare che poeta

nara cand’as versadu contribbutu:

si no t’an aplicadu una marcheta

como deves restare murri-asciutu.

Si chimbant’annos as cantadu a rima

bi devias pensare dae prima.

 

 

16. Piras (41”)

Ma deo so comente-i su falcu,

and’a catza e calchi pegus leo.

No m’an postu marchetas in su palcu:

ne nde chelzo, ne penso, ne bi creo:

mi poden aer postu calchi malcu

ma calecunu nd’apo postu deo.

Deo malcos nde juto de seguru

però ja nd’apo postu deo puru.

 

 

17. Sozu (1’03”)

Ja mi piaghet sa tua proposta

e lu naras cuntentu e faci-tostu.

Nemmancu deo mi so iscumpostu

s’apo in palcu retzidu una batosta

ma dae cussas marcas chi ti an postu

no as diritu ’e b’andare a sa posta.

Po chi nd’apas iscutu in su duellu

no as diritu a-i cudd’isportellu.

 

 

18. Piras (46”)

A-i cuss’isportellu no be-i ando

mancari primu chi ’enza defuntu.

Sa limùsina a nemos no domando

ca no so arrivadu a cussu puntu:

ancora isto in su palcu e ja cumando,

peus po custos s’est chi m’an assuntu.

Deo no nde pretendo ca mi caglio:

mi paghen solu cando lu trabaglio.

 

 

19. Sozu (59”)

Non drommimos pro unu ninna-nanna

mancu de una ’oghe armoniosa.

Però oe sa zente est disizosa

a che passare ’e sa posta in sa janna

e si m’aian dadu calchi cosa

mi l’aia leadu a facia manna

comente totu inie a bona gana

ma sa disgrascia est chi no mi nde dana.

 

 

20. Piras (50”)

Tue de ti nde dare ses in gana

e ammito chi calcunu ti nde diat.

Però lea a messare sa frullana

po chi sa zoronada fata siat

però cumbinat chi no ti nde dana

e tando s’òmine aterue aviat:

da chi fiagu’e asciutu bi nuscat

e chi no nde li dan ja si nde buscat.

 

 

21. Sozu (1’00”)

Però tue mi ses poninde in suddu

nende: su poltafogliu no abbelzo.

Deo no so guvernu ne nde ofelzo

però nd’atzetan custu che-i cuddu.

Naran che-i su padre: no nde chelzo

e betademichelu in su cuguddu,

ca penso si ti jaman a incue

ch’a sa posta b’acostas fina tue.

 

 

22. Piras (44”)

Ma deo in su cuguddu no nde leo

ne po pedire ispalgo sa manu:

so da sos acatones a lontanu,

lìbberu fui e lìbberu arreo,

ca tantu su guvernu italianu

ja est ispiantadu cant’e deo

chi est acantu a ruer in s’abbissu

e no b’ando a pedire dae issu.

 

 

23. Sozu (54”)

Chi est ispiantadu ja be-i creo

ca sa bilancia nostra si est guasta.

Ma no la devo aggiustare deo,

no b’apo inie sas manos in pasta:

no mi nd’impoltat si ponen a s’asta

finas sas pedras de su Colosseo

e in sos edificios de afaca

ja no bi ponzo nudda dae bujaca.

 

 

24. Piras (43”)

Tando cheres chi sias moderadu:

faghe che deo e pone mente a mie.

Istas in s’isportellu chirriadu

ca t’iscùrigat sempre e faghet die:

lu ’ides, su guvernu ispiantadu

e tue cheres a nde dare a tie:

tantu como no b’ana mancu re

e issu nd’at a cherrer dae te.

 

 

25. Sozu (1’04”)

In sa lògica ’e prima ancora arreo,

no lu so nende mancu cun ingannu.

Sa natzione chi at dépidu mannu

cant’e totu s’Italia bi creo

ma da su chi lassare li pot’eo

no los pagat sos dépidos ocannu

a s’apagare etotu brama e gana:

gai leo su pagu chi mi dana.

 

 

26. Piras (49”)

Però sa natzione est in guai:

meda su deficit e paga muneda.

Gai est tratende in guantes de seda

ma no che podet, no, ’essire mai

ca unu diciu antigu narat gai

chi chentu pagos faghen unu meda.

E tue, Peppe, ìstande seguru:

su pagu tou l’as a ponner puru.

 

 

27. Sozu (1’02”)

Como tocat s’esordiu de arrere

ma ti nar’una cosa e bista atentu.

Totu sos membros de su Parlamentu

chi sun disisperados cheres crere:

como chi est s’Istadu in fallimentu

totu cheren andare a su podere.

Nisciunu istare si che cheret fora:

est signu chi ite lingher bi at ancora.

 

 

28. Piras (49”)

Ma dognunu est chilca ’e calchi iscutu

però como ’e finire ti do prou.

Chie bi fut da deris ja b’at sutu,

chie at sa pudda e chie leat s’ou:

Andreotti, s’iscuru, ja nd’est rutu

ma como ch’est pighende dae nou.

Est in catza ’e pigare, in mente tene:

cheret narrer chi ja si b’istat bene.