Si ndi pesat su pruini in pissu de is prus de centucincuanta personis acapiadas a is contus de giustissia de Jeffrey Epstein, su finantzieri americanu chi s’est bociu in dd’unu presoni de New York in su 2019 in su mentris chi aspetaiat su processu po mori de traficu sessuali de piciocheddus. Is nominis insoru non si connosciant de annus meda, ma unu giugi at fatu sciri ca non c’at perunu giustificu po sighiri a ddus poderai segretus. Sa parti de su cumentzu est su paris de coranta documentus, chi a innantis non furint stetius scoviaus, cun cuasi milli paginas de depositzionis e declaratzionis. Intru de is nominis una filera de socius de Epstein, chi a innanti si connosciant comenti de John o Jane Doe , in d’una causa movia de Virginia Giuffre contras de s’amanti becia de su finantzieri Ghislaine Maxwell, cundennada a bint’annus de presoni po airi cuberau piciocheddas. Intru de custas sa matessi Giuffre.
Sa filera de is nominis, intru de custus s’agatanta Bill Clinton, Donald Trump, su principi Andria, Michael Jackson, David Copperfield, su guvernadori beciu de su New Mexico Bill Richardson, Marvin Minsky, Stephen Hawking, Jean Luc Brunel, Glenn Dubin, at amostau in sa genti curiosidadi, ma is autoridadi faint sciri ca “no est una filera de ‘clientis’ e non ddu at peruna cumplicidadi cun is curpas de Epstein”.
In parti, in is paperis si dde agatant partis de is fueddus de Ghislaine Maxwell e Virginia Roberts Giuffre. Comenti si ddue agatant is fueddus de Johanna Sjoberg, un’atra giovana chi fut in is girus de Epstein, chi contat comenti su principi Andria ddi tocaiat is titas in manera brullana in su mentris chi faiat fotografias.
A dogna manera custu contu puru fut connotu, ma custa est sa borta de unu chi is fueddus si podint ligiri. Su principi Andria cun Virginia Giuffre, comenti narat unu paperi de is abogaus de su principi, iant giai agatau, a su tempus, un’acordiu, a foras de sa giustissia.
Màuru Mura
Mercuris, su bintiseti de mesi de Idas de su 2023
Attività realizzata col contributo della Regione Sardegna – Imprentas 2023-2024.
Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2023-2024. Lei Regionali 22/2018
Foto: https://www.arabonormannaunesco.it/caso-epstein-tra-i-nomi-divulgati-dallfbi-anche-politici-e-cantanti-famosi-linchiesta-si-allarga/
