selisSa Banda de sa Magliana fut un’organizatzioni criminali chi at tentu in farrancas a Roma, de sa segunda metadi de is annus ’70 finas a su ’90, prus o mancu, e chi si fut formada cun s’unioni de is diferentis baterias de delincuentis de is cuarteris romanus (Magliana, Testaccio-Trastevere-Monteverde, Acilia-Ostia, Tufello-Alberone). De candu sa Magliana iat cumentzau sa scola sua (1976), finas a candu no nci dd’at acabbada carragiau in-d-un’isca disconnota de su Tevere (1981), Nicolino Selis, annomingiau Il Sardo fut istétiu unu de is boss prus de importu de cust’arei de delincuentis, chi si fuant fatus meris de sa citadi a fortza de prumu.

 

Selis fut nàsciu in Nùgoro in su ’52 e fut disterrau in Ostia, euba, gràtzias a sa connoscéntzia fata in galera cun su camorrista Raffaele Cutolo, iat póssiu fai boxi manna in su campu criminali e in su spaciu de droga ispetzialmenti. Su tenni custu cuntatu, e su essi amigu cun Gianfranco Urbani (annomingiau Er Pantera) e cun Edoardo Toscano (L’Operaietto), su primu in sa bateria de su Tufello e su segundu in cussa de sa Magliana, dd’iant fatu imbucai in sa banda. Bardanas, secuestrus, spaciu de droga, iscumissas, prostitutzioni e bocidorgius fuant su pani fitianu de custa banda, chi si fut acapiada a sa màfia, a sa camorra e a sa ’ndràngheta puru, e chi iat istrintu amigàntzia cun s’estremismu de destra, cun alas deviadas de is serbìtzius segretus italianus, de sa finàntzia vaticana (IOR), de sa massoneria (P2) e de sa polìtica.

 

Agoa de s’assassìniu de su fundadori e capu de sa banda Franco Giuseppucci (Er Negro), po mori de una disamistadi chi dd’oponiat a su clan de is Proietti (I Pesciaroli), fatu sucédiu a cabidanni de s’’80, a intru de sa Magliana iscopiat una gherra de ‘sucessioni’. Selis, chi fut in briga cun Maurizio Abbatino (Crispino) po ndi ciapai is ordinagus de sa banda, agatat sa morti su 3 de friargiu de s’’81, in Ostia etotu, po manu de Abbatino, Antonio Mancini (L’Accattone) e Marcello Colafigli (Marcellone), in acórdiu finas cun atrus dûs de is boss prus mannus de sa banda: Enrico de Pedis (Renatino) e Danilo Abbruciati (Er Camaleonte). Su corpus de Nicolino Selis, imboddiau de carcina e pìbiri po non fai acostiai is animalis e po chi s’essit purdiau prus allestru, no est mai stétiu agatau. Sa carrera criminali de “Il Sardo” si serrat innoi, a bintinoi annus.